Портал пайдаланушылары – мүгедектігі бар адамдар және әлеуметтік қызметтерді көрсетушілер үшін орталық операторлары ақпараттық-консультациялық қызметтерді мемлекеттік және орыс тілдерінде ұсынады. Атап айтқанда, бұл порталда кеңес алуға, техникалық мәселелер бойынша сұрақтарға жауап алуға, портал функцияларын жетілдіру бойынша кері байланыс орнатуға болады. Бүгінгі таңда байланыс орталығында 3 аналитик және 5 оператор жұмыс істейді, тағы үшеуі арнайы оқудан өтіп жатыр.
Сондай-ақ Facebook әлеуметтік желісінде, Telegram мессенджерлерінде және WhatsАpp пайдаланушыларына кеңес беру үшін чат-ботты іске қосу жоспарланып отыр. Бұған қоса автоматтандырылған дауыстық роботты енгізу жұмыстары жүргізілуде. Бұл консультациялар қолжетімділігінің жоғары деңгейін қамтамасыз етуге, жауап берілмей қалған қоңыраулар санын азайтуға және мәселе шешілгенге дейін күту уақытын азайтуға мүмкіндік береді.
Жалпы, Әлеуметтік қызметтер порталы мүгедектігі бар адамдарға тікелей жеткізушілерден оңалту құралдары мен қызметтерін өз бетінше сатып алу мүмкіндігін беру үшін 2020 жылы іске қосылды. Осы жылдың басынан бастап 113 мыңнан аса мүгедектігі бар адам портал арқылы оңалтудың техникалық құралдарын, ымдау тілінің 6 мыңнан аса қызметін, жеке көмекшінің 31 мыңнан аса қызметін, 36 мыңға жуық санаторлық-курорттық емдеу қызметін алды және 122 мыңнан аса адам кепілдік берілген әлеуметтік топтамаларға тапсырыс жасады.
«Егемен-ақпарат»
