Будапеште жүлде қоры 235 238 АҚШ долларын құрайтын WTA турнирінің алғашқы айналымында грузиялық Екатерина Горгодзеден (әлемнің 215 ракеткасы) айласын асырған Юлия Путинцева кеше хорватиялық Ана Конюхты (114) 6:4, 6:3 есебімен қапы қалдырды. Енді ол украиналық Катерина Козловамен (154) кездеседі.
Лозаннада доданың тұсаукесер кездесуінде швейцариялық Симона Вальвертке (235) шаң қаптырып кеткен Зарина Диас (114) келесі кезеңде италиялық Камила Джорджимен (61) шеберлік байқасады.
Ал АҚШ-тың Ньюпорт қаласында шымылдығы түрілген АТР турнирінде Александр Бублик (37) хорватиялық Иво Карловичпен (210) күш сынасты. Екі сағатқа жуық уақытқа созылған тартыс 7:6, 4:6, 6:1 есебімен жерлесіміздің пайдасына шешілді. Бубликтің ширек финалдағы қарсыласы –тайпейлік Джейсон Джунг (163).
