10 тур бойы шашасына шаң жұқтырмай, жалпы есепте жеке-дара көш бастап тұрған Словенияның жас жұлдызы Мюре мен Сен-Лари-Сулан аралығындағы сайыста алдына жан салмады. 178,4 шақырымдық қашықтықты Погачар 5 сағат 03 минут 31 секундта жүріп өтті. Екінші және үшінші орындарды даниялық Йонас Вингегор («Team Jumbo-Visma») мен эквадорлық Ричард Карапас («INEOS Grenadiers») иеленді. Кезең жеңімпазынан үш минутқа жуық уақыт қалып қойған «Астананың» серкесі Алексей Луценко 12 сатыға табан тіреді.
Таулы аймақтағы жеңісінен кейін Тадей Погачар өзге қарсыластарының барлығынан қара үзіп кетті. Оның көрсеткіші – 71:26:27. Словениялық велошабандозды өкшелеп келе жатқан Йонас Вингегор одан бақандай 5 минут 39 секунд қалып келеді. Ал қазақстандық спортшы Алексей Луценко жалпы есепте сегізінші сатыға сырғып түсті.
