Е.Қарашөкеев Маңғыстау облысындағы қатты құрғақшылықтан зардап шеккен аграршыларға көмек көрсету үшін Үкімет пен ауыл шаруашылығы министрлігі қабылдап жатқан жедел шаралар туралы хабарлады. Атап айтқанда, 12 шілдеде Үкімет резервінен ауыл шаруашылығы жануарларының қыстауы үшін азық құнын арзандатуға 1,9 млрд теңге бөлінген. Ол үй және шаруа қожалықтарының иелеріне беріледі.
Азық-түлік корпорациясы арқылы Маңғыстау облысы үшін құны нарықтық бағадан 17%-ға төмен 637 тонна арпа сатылды. Оның ішінде 211 тоннасы үй шаруашылықтарына сатылды. Келесі аптада қосымша 573 тонна арпа жеткізілетін болады.
Кездесу барысында орман шаруашылығы, резерваттар аумақтарында мал жаю және шөп шабу мәселесі де пысықталды.
Елден азық шығаруға тыйым салу бойынша шаралар қабылданатын болады. Жемшөп дайындау үшін арзандатылған ЖЖМ көлемдерін қайта бөлу мәселесі де қосымша қарастырылуда.
«Азық-түлікпен қамтамасыз ету және жедел әрекет ету мәселелерін шешуді үйлестіру үшін, АШМ жанынан Республикалық жедел штаб құрылды. Оның құрамына облыс, аудан әкімдерінің орынбасарлары, «Бәйтерек» холдингі мен Азық-түлік корпорациясының қаржыландырушы ұйымдарының басшылары кірді. Облыс әкімдіктері алдағы қыстауға арналған жем дайындау жоспарын айқындап, оларды орындау бойынша апта сайынғы мониторингтік жұмыстарды ұйымдастырды», деді министрдің міндетін атқарушы.
Сапар соңында Е.Қарашөкеев облыс әкімі Серікбай Трұмовпен кездесіп, өңірдің ауыл шаруашылығын дамыту мәселелері жөніндегі кеңеске қатысты. Өңірдегі шаруашылықты жем-шөппен қамтамасыз ету жөніндегі жүйелі шешімдерді іске асыруды, жемшөпті форвардтық сатып алу және жемшөп құнын арзандату үшін жергілікті бюджеттерден қосымша қаражат қарастыруды, сондай-ақ ірі мұнай және құрылыс компанияларының техникасын Батыс Қазақстан және Ақтөбе облыстарынан азық жеткізуге жұмылдыруды ұсынды.
Мал шаруашылығын қолдау үшін, өңірде фермерлердің кредит бойынша төлемдерін ұзарту мәселесі қаралатын болады.
«Әкімдікпен бірлесіп жем-шөп өндірісін дамыту және жайылымдарды жақсарту бойынша жүйелі шаралар қабылдайтын боламыз. Мұнда барлық иесіз жатқан құдықтар мен ұңғымаларды түгендеу, су бөгеттерін салу және ғалымдармен бірлесе отырып құрғақ дақылдарды өсіру қажет. Ең бастысы, сыни жағдайлар туындаған кезде уақтылы шешім қабылдау керек, өйткені бұл тәуекелдер болжанып отыр», деді Е.Қарашөкеев.
Сондай-ақ ол ауыл шаруашылығы министрлігі әрдайым ашық екенін және өңірлердің ұсынысын Үкімет деңгейіне қарауға шығаруға дайын екенін айтты.
