Үдемелі индустриялық-инновациялық даму мемлекеттік бағдарламасының аясында 2010-2018 жылдар аралығында облыста 38 жобаны жүзеге асыру көзделген. Белгіленген жоспар бойынша қазірге дейін 29 жоба іске қосылып, 4 мыңнан аса жұмыс орындары ашылды.
Үдемелі индустриялық-инновациялық даму мемлекеттік бағдарламасының аясында 2010-2018 жылдар аралығында облыста 38 жобаны жүзеге асыру көзделген. Белгіленген жоспар бойынша қазірге дейін 29 жоба іске қосылып, 4 мыңнан аса жұмыс орындары ашылды. Оның ішінде көлемі 21 миллиард теңгені құрайтын және 626 жұмыс орнымен қамтамасыз еткен 8 инвестициялық жоба өткен жылы өз жұмысына кірісті. Бір жобаның тұсауы сол жылдың соңына дейін кесілсе, 5 жоба биылғы жылы, ал 3 жоба 2015-2018 жылдары ел игілігіне беріледі. Елдің әлеуметтік жағдайы мен экономикасына үлес қосқан жаңа жобалардың 19-ы немесе 66 пайызының «мекенжайы» аудандарға тіркелген.
Дей тұрсақ та, облыста қиын түйінге айналып отырған бір жоба бар. Ол – Мойынқұм ауданындағы «ACIG» АҚ деп аталатын Хантау цемент зауыты. Бұл компания жұмысы айналым қаражатының жеткіліксіздігінен өнім өндіре алмай, тоқтап тұр. Қазіргі уақытта осы түйінді жоба бойынша жаңа инвестор табылған. Қиын шақта қол ұшын берген қаржы иесінің айтуынша, компания жақын уақытта іске кірісіп, 2014 жылдың алғашқы жартысынан бастап өнім өндіре бастамақ.
Көсемәлі СӘТТІБАЙҰЛЫ,
«Егемен Қазақстан».
Жамбыл облысы.
