Облыстың Ақжайық ауданында бұл таңда барлық меншікте 61 808 ірі қара, 176 568 уақ мал, 18 318 жылқы бар. Бұл былтырғы осы кезеңмен салыстырғанда тиісінше 4,3, 8,5 және 12 пайызға артық. Өткен жылы шаруа қожалықтары 352 бас асыл тұқымды ірі қара, соның ішінде 125 бас аталық сатып алды, мұндай түліктердің саны да жыл өткен сайын артып келеді.
Облыстың Ақжайық ауданында бұл таңда барлық меншікте 61 808 ірі қара, 176 568 уақ мал, 18 318 жылқы бар. Бұл былтырғы осы кезеңмен салыстырғанда тиісінше 4,3, 8,5 және 12 пайызға артық. Өткен жылы шаруа қожалықтары 352 бас асыл тұқымды ірі қара, соның ішінде 125 бас аталық сатып алды, мұндай түліктердің саны да жыл өткен сайын артып келеді.
Ал жаңа жылмен бірге тағы бір келген жақсылық Бударин ауылдық округіндегі «Аманер» шаруа қожалығына көршілес Ресейдің Орынбор облысындағы Первомайский ауданынан 100 бас қазақтың ақбас сиырларының қашары әкелінді. Фурманов атындағы ауылшаруашылық өндірістік кооперативінен сатып алынған бұл түліктердің біздің өзіміздегі ақбас сиырларға қарағанда бір өзгешелігі – түстері күреңдеу. Шаруа қожалығының иесі Қанат Досқалиев сондай-ақ, «орынборлық» қашарлардың ірірек тұрпатына қызыққанын жасырмайды. Оның қонысында сиырларды жасанды ұрықтандыру пункті жұмыс жасайды, арнайы ұрықтандырушы-техник бар. Қазір ветеринарлық-санитарлық талаптарға сәйкес, қашарлар карантинге қойылып, облыстық ветеринарлық зертханасымен келісімшарт жасалып, мал кеселіне қарсы зерттеу жұмыстары жүргізілуде. Қ.Досқалиев аталған малды ауданның өзінде 2012 жылдың күзінде іске кіріскен «Ақжайықагро» несие серіктестігінен иеленген 30 млн. теңгеге сатып алды. Айта кетейік, «Ақжайықагро» соған дейін 7 шаруа қожалығына өз тірліктерін жандандыру үшін 16 млн. 600 мың теңге қаржы беру мүмкіндігін тапты. Бүгінге 22 шаруа қожалығы және бір ЖШС құрылтайшысы болып табылатын бұл несие серіктестігіне жүгінушілер қатары көбейе түсуде. Биыл «Ақжайықагро» кем дегенде 120 млн. теңге несие беру мүмкіндігін қарастырып отыр.
Темір ҚҰСАЙЫН,
«Егемен Қазақстан».
Батыс Қазақстан облысы.
