Д.Серікбаев атындағы ШҚТУ-де мұндай 32 бағдарлама қарастырылған. Барлығы Қазақстан экономикасын дамыту жолында еңбек ететін мамандарды даярлауға бағытталғаны анық. Соның бірі, бірегейі – медициналық инжиниринг. Айтар болсақ, «Медициналық инжиниринг» бағыты бойынша білім беру бағдарламасы Д.Серікбаев атындағы Шығыс Қазақстан техникалық университетінде 6В07105 «Аспап жасау» мамандығы шеңберінде бакалаврларды даярлайды.
Оқу медициналық техникаларды өндірумен айналысатын әлемдік фирмалардың бағдарламалары негізінде жүргізіледі. Олардың методикалары білікті, білімді әрі сұранысқа ие мамандарды даярлауға арналған. Оқытудағы әдіс-тәсілдердің өзі шетелдік профессорлармен тізе қоса отырып жасалды.
Студенттерді даярлау кезінде елімізде қолданылатын медициналық техникалардың құрылысын, қолдану ерекшеліктерін, жұмыс істеу принциптерін көрсете отырып оқытады. Атап айтқанда, Siemens, Roche Diagnostics GmbH, Tem Innovations GmbH, Arkray, Iris, BST медициналық техникаларды пайдаланады. Қолданыстағы жабдықтар тәжірибе жинақтауға мол мүмкіндік береді.
Сөйтіп оқуды тәмамдаған түлек жұмыс тәжірибесіне, жеке жетістіктеріне қарай инженер, инженер-конструктор, инженер зертханашы, жөндеу жөніндегі инженер, өндірісті дайындау жөніндегі инженер, метролог сынды мамандықтарды алып шығады. Бакалавр болып шыққан соң «Медициналық инжиниринг» бойынша ШҚТУ магистратурасында оқуын жалғастыруға мүмкіндігі бар. Педагогикалық профильдің кәсіптік бағдарламасын игерген жағдайда докторантураға түсуге болады. Мінеки, жаңа әдістің білім алам деушілерге мүмкіндігі мол.
