Бадам стансасынан жолданған мал азығы Маңғыстау облысының Шетпе, Құрық және Жетібай стансаларына жеткізіледі. Ол жақта көмекті күтіп алып, үлестіретін азаматтар бекітілген.
«Бүгінгі игі акцияға аудан көлеміндегі «Батсу водоканал» ЖШС, «Ордабасы тас» ЖШС, шаруа қожалықтары, аудандық мәслихат депутаттары, Nur Otan фракциясының мүшелері, ерікті азаматтар, аудан тұрғындары үлес қосты. Біз – Маңғыстау жұртымен біргеміз!», деді Nur Otan партиясы Ордабасы аудандық филиалы төрағасының бірінші орынбасары Алиасқар Бердімұрат.
Ордабасы ауданы әкімдігі мен партияның жергілікті филиалы жем-шөп мәселесін бақылауда ұстап отыр. Аудандық ауыл шаруашылығы бөлімінің басшысы Әбілда Әлібековтің айтуынша, аймақта мал азығы жеткілікті деңгейде.
«Дегенмен, жылдағыдай бітік шөп болмауына байланысты аудан әкімі Бағлан Батыршаевтың бастамасымен әрбір ауыл округінде мал азығын жинау бекеті ашылды. Жем-шөп қоры жиналып жатыр. Осы қор арқылы қыста әлеуметтік аз қамтылған, мал азығын жинауға шамасы жоқ, асыраушысынан айырылыған отбасыларға жем-шөп беріледі. Аудан әкімдігі қысқы науқанға дайындықты бастап кетті», дейді ол.
