Сынақтар Израиль Денсаулық сақтау министрлігі мақұлдағаннан кейін Сураски медициналық орталығында жүргізіледі. Тестілеуге басқа вакцинамен егілмеген 24 ерікті қатысады. Топтың жартысы бір капсуланы, ал қалғандары препараттың екі дозасын қабылдайды. Зерттеу мерзімі алты аптаға созылмақ.
Oramed Pharmaceuticals компаниясының бас директоры Надав Кидрон жаңа вакцинаның бірнеше артықшылықтарын атады.
«Біріншіден, ол коронавирустың әр түрлі штамдарына төзімді, өйткені Moderna және Pfizer-ге қарағанда ол вирустың үш құрылымдық ақуызына бағытталған. Екіншіден, мұндай препараттар, әдетте, жанама әсерлерді көп тудыра бермейді. Болашақта вакцинаның бұл түрі оны үйде отырып-ақ қабылдауға мүмкіндік беретін болмақ», деп түсіндірді компания директоры.
Надав Кидронның айтуынша, капсулалы вакцинаны бүкіл әлем бойынша тасымалдау қиындық тудырмайды. Себебі, оны сақтау үшін ерекше шарттар қажет емес, сондықтан вакцинаны стандартты температурада тасымалдауға болады.
Oramed Pharmaceuticals компаниясының бас директоры медициналық зерттеу сынақтары сәтті өтсе, оның басқа елдерге тарату жолдарын іздейтінін айтты. Оның айтуынша, мұндай препараттар әсіресе Оңтүстік Америка мемлекеттеріне қажет.
