– Ауыл әкімінің сайлауына саяси партиялардан (Nur Otan – 15, «Ауыл» ХДПП – 5, АDAL саяси партиясы – 2, ҚХП – 2) 24 үміткер ұсынылды. Өзін өзі ұсынған үміткерлер саны – 28. Үш округте 2 (Атырау қаласының Қайыршахты, Құрманғазы ауданының Сафон, Теңіз ауылдық округтері), 1 округте (Махамбет ауданының Сарайшық ауылдық округі) 4, ал 14 округте 3 үміткерден тіркелді. Сайлау бюллетеньдері жалпы сайлаушылар санының бір пайызына артығымен дайындалып, сайлау округтеріне, учаскелерге жеткізілді, – дейді Азамат Айманакумов.
Оның айтуынша, сайлаушылар тізіміне 44 305 сайлаушы енгізілген. Сайлау учаскелері құрылмаған 12 елді мекенде дауыс беруді ұйымдастыру мәселесі шешімін тапқан. Ең шалғайдағы сайлау учаскелері Құрманғазы ауданының орталығынан 180 шақырым қашықтықтағы Асан ауылдық округінде орналасқан.
Атырау қаласына таяу орналасқан Дамбы ауылында әкім сайлауына жеті үміткер ұсынылғанымен, оның үшеуі ғана тіркеуден өтті. Сол үшеудің біріне 1 891 сайлаушы таңдау жасады. Осындағы Амангелді атындағы мектепке орналасқан №68 сайлау учаскесіндегі сайлау комиссиясының хатшысы Мереке Тайровтың мәліметінше, бұл ауылда 3 600-ден астам тұрғын бар.
– Сайлау учаскесі таңғы сағат 7:00-де ашылды. Сайлау учаскесі ашылған сәтте алғашқы болып ауылдың 45 жастағы тұрғыны Альберт Машқалиев өзі таңдаған үміткерге дауыс берді, – дейді Мереке Тайров.
Ауылдағы сайлау учаскесінде сайлаушылардың жасырын дауыс беруі үшін бес кабина орнатылыпты. Ал мүмкіндігі шектеулі жандарға арналған тағы бір кабина жабдықталған. Мұнда арақашықтықты сақтау жөніндегі нұсқаулықтар ілінген. Сайлау учаскесінің кіреберісінде сайлаушылардың дене қызуы өлшенді. Содан соң сайлаушылар Ashyq жүйесіндегі QR код арқылы өтті. Сайлаушылар дауыс берген соң басқа есік арқылы сыртқа шықты.
– Біз сайлау учаскесіне келе алмайтын, мүмкіндігі шектеулі немесе егде жастағы тұрғындар үшін арнайы өкілді үйіне жіберіп, дауыс беруіне мүмкіндік жасадық. Сондай сайлаушылардан 36 өтініш түсті. Түскі сағат 12-ге дейін тұрғындардан түскен өтініштер жинақталып, жылжымалы дауыс беру шаралары ұйымдастырылды, – дейді М.Тайров.
Бұл ауылда дауыс беруге отбасымен келгендер де бар. Солардың қатарындағы мектеп мұғалімі Ботагөз Мадағаева жұбайымен, ата-енесімен бірге таңдауын жасады.
– Мектепте мұғалім болып жұмыс істеймін. Осында тұратын болғандықтан, ауылдың болашағына бейжай қарай алмаймыз. Ауылымыз өркендеп, тұрғындардың әл-ауқаты жақсарғанын қалаймыз. Біздің ауылда белсенді жастар көп. Олар ашық алаңда әртүрлі спорттық турнир ұйымдастарып, жас буынның, әсіресе мектеп оқушыларының саламатты өмір салтын ұстануына атсалысып жүр. Жас волонтерлер қайырымдылық акцияларын өткізіп, тұрмысы төмен отбасыларға баспана мен азық-түлік себетін сыйлап келеді. Ауыл әкімі қазақтың қайырымдылық қағидасын өнегелі ісімен дәлелдеп жүрген осындай белсенді жастарға қолдау білдірсе, тұрғындардың ауызбіршілігі нығайып, жаман әдеттен арылған болар еді, – деп өз пікірін білдірді Ботагөз Мадағаева.
Медицина саласында жұмыс істеп, зейнеткерлікке шыққан Мақпал Темірованың пікірінше, ауыл адамдарының байырғы кәсібінің қатарында егін егу мен төрт түлік өсіру бар. Алайда егін шаруашылығын дамытуға судың жетіспейтіні қолбайлау болып отыр. Ауыл әкімі осы мәселеге ден қойса, ауылдан көшу тоқтап, жастар арасындағы жұмыссыздықты азайтуға ықпалы тиеді. Ал балабақша қызметкері Айман Мұсаеваны балалар ойнайтын алаңның жоқтығы алаңдатады. Дегенмен осы мәселенің үміткерлердің бағдарламасынан көрініс тапқаны үміт отын маздатып отыр.
Атырау облысы
