Іс-шараға Birgemiz республикалық волонтерлер фронт-офисінің басшысы Татьяна Миронюк, фронт-офистің сарапшысы Олжас Әбдухамитов және өңірдегі волонтерлік ұйымдардың белсенділері, жастар ресурстық орталықтарының басшылары қатысты.
Кездесу барысында қатысушылар волонтерліктің жол картасын жүзеге асыру, волонтерлік қызметті қолдау стандартын әзірлеу мәселелерін талқылады. Еріктілердің ерен істерін дамытудың жаңа қырлары іздестірілді. Бұл тарапта кездесуге қатысушылар өздерінің оралымды ойларын бөлісіп, пайымды пікір білдірді.
Татьяна Миронюк атап өткендей, бүгінде Қазақстанда 600-ге жуық волонтерлік ұйым жұмыс істейді. Жыл сайын елімізде белсенді азаматтық ұстанымын көрсетуге және мұқтаж адамдарға көмектесуге ниет білдірген еріктілер саны көбейіп келеді. Ақмола өңірінде де жаман індет шыққалы атымтай жомарттардың елге қайырымдылық жасаған көмектері аз емес. Оның барлығы қысылған жанға көп-көрім демеу болса, жас құрақтай желкілдеп өсіп келе жатқан жастарға өміршең өнеге, әдемі үлгі. Бүгінгі күні мыңдаған еріктілердің басын құрайтын 90 ұйым жұмыс істеуде. Ел иығына түскен жүкті осы еріктілер көтерісіп отырғандығын айта кетсек, артық болмас.
Кездесу соңында Birgemiz республикалық волонтерлер фронт-офисінің өкілдері жастар ресурстық орталықтарының қызметкерлері үшін жанашырлық жасаудағы жаңалықтың жайын ұқтыратын мәселелерді бүге-шігесіне дейін талқылады.
Ақмола облысы
