Жақында Италияның Асиаго қаласында шаңғыдан Әлем кубогының төртінші кезеңі өтті. Дүбірлі жарыс Сочи Олимпиадасы алдындағы дайындық әрі сынақ деуге келеді. Мұның алдында риддерлік шаңғышы Алексей Полторанин Әлем кубогы жарысында күміс алқаны иеленген. Классикалық спринтте Алексей басты қарсыласы ресейлік Никита Крюковқа 0,14 секөнт ұтылып, екінші орынға табан тіреді. Бұдан кейін спринттік жарыста Алексей өзінің досы Николай Чеботько екеуі тағы да күміс алқаны олжалады.
Дүние додасының дүбірі
ХХІІ Қысқы Олимпиаданың басталуына 23 күн қалды
Жақында Италияның Асиаго қаласында шаңғыдан Әлем кубогының төртінші кезеңі өтті. Дүбірлі жарыс Сочи Олимпиадасы алдындағы дайындық әрі сынақ деуге келеді. Мұның алдында риддерлік шаңғышы Алексей Полторанин Әлем кубогы жарысында күміс алқаны иеленген. Классикалық спринтте Алексей басты қарсыласы ресейлік Никита Крюковқа 0,14 секөнт ұтылып, екінші орынға табан тіреді. Бұдан кейін спринттік жарыста Алексей өзінің досы Николай Чеботько екеуі тағы да күміс алқаны олжалады.
Алексей үлкен спортқа қалай келген еді?» деген сауал оқырмандарды қызықтырса керек. Алексейді бала кезінен білеміз. Риддер қаласындағы дарынды балаларға арналған спорт мектебіне барып жүргенімізде сырықтай арық, көзінен жалын шашып тұратын баланы ұстаздары болашақта осыдан дарынды шаңғышы шығады деп таныстырған. Иә, үміт алдамаған екен. Ол 11 жасынан шаңғы спортымен жаттыға бастады. Бапкері А. Наконечный алған бетінен қайтпайтын қайсар баланың болашағынан үміт күткен еді. Себебі, ол басқаларға қарағанда, табандылықпен ұзақ жаттығатын, сенбі, жексенбі күндері де шаңғысын киіп алып ну орманның ішінде жалықпай жүгіретін. Сол бала алғаш рет облыстық, республикалық жарыстарда топ жармаса да алғашқы алтылыққа еніп жүрді. Үш жылдан кейін Алексей жасөспірімдер арасындағы әлем чемпионатына қатысу мүмкіндігіне ие болды.
2004 жыл. Норвегияда шаңғы спортынан жасөспірімдер арасында әлем чемпионаты басталды. Қазақстан құрамасы сапында риддерлік 17 жасар Алексей Полторанин де бар. Жарыстың үшінші күні ол бір топ әріптестерімен бірге эстафеталық жарысқа түспек. Бапкері шәкіртіне дем беріп, жігерлендіріп қойды.
– Алексей, сен үшінші кезекте жүгіресің. Бұл шешуші кезең екенін естен шығарма. Команданың жүлделі орын алуы саған байланысты. Намысты қолдан берме, – деді бапкері А.Наконечный.
10 шақырымдық эстафетаға бес команда қатысты. Қазақстандық шаңғышы қарсыластарынан бес секөнт кешігіп эстафета таяқшасын алды. Алексей бес шақырым жүгіргеннен кейін қарсыласын қуып жетіп, жеті секөнт ерте жетіп, төртінші кезекте жүгіретін әріптесіне берді. Алексейдің алтын уақыты құрама жігіттеріне алтын алқа сыйлады. Төрт жігіттің қуанышында шек жоқ, бір-бірін құшақтап, құттықтап жатыр. Сол жылы 17 жасар шаңғышы халықаралық дәрежедегі спорт шебері атағына ие болды.
2006 жыл! Италияның Турин қаласында Қысқы Ақ Олимпиада ойындары өтіп жатыр. 19-ға толмаған Алексей Туринде сәтсіз өнер көрсетті. Қарсыластары кілең бір «сен тұр, мен атайын» деген саңлақтар болған соң ба, әйтеуір жолы болмай-ақ қойды. Алайда, жас жігіттің жігері мұқалған жоқ, «онда төрт жылдан кейін Ванкуверге бара қалсам, есемді жібермеспін» деді өзін-өзі қайрап.
2007 жылы Қытайдың Чангчун қаласында VI Қысқы Азия ойындарының алауы жағылды. Мұның алдында Азия ойындарында командалық есепте төртінші орында қалып қойған жерлестерімізге спорт басшылары қатаң талап қойды. Шаңғышылар кем дегенде, үш-төрт алтын алқаны алулары қажет. Рас, шаңғышылар екі-үш алтын алқаны иеленді, бірақ Алексей бұл жолы тағы да алтынсыз қалды. Спринтте екінші, он шақырымдық еркін жүгіруде де күміс алқаны иеленді.
Канаданың Ванкувер қаласында өткен ХХІ Қысқы Олимпиада ойындарына Алексей тас түйін әзірлікпен келді. Мұның алдында шаңғы спортынан өткен Әлем кубогы жарыстарында жаман нәтиже көрсеткен жоқ. Бірер рет алтылыққа енген азаматтан бапкері үміт күткені жасырын емес. Ванкуверге жиналған кілең бір ығай-сығайлар алтын алқаны сарапқа сала бастады. Норвегиялық атақты шаңғышы Нортуктың жұлдызды шағы туғандай. Ол екі алтынды талассыз жеңіп алды. Міне, спринттік жарыста да «алтын алқа менікі» дегендей, тәкаппарлана қарайды. Спринттік жарыста Алексей атақты Нортукпен үзеңгі қағыстырып келе жатқан. Нортуктан қалып қоймаса, бір медальді алатынына сенімді еді. Амал бар ма, бұрылыста шалынып құлап, көмбеге бесінші болып жетті. Әттең, құлап қалмағанда, үшінші орынға табан тірері сөзсіз еді. Бұдан кейін командалық спринтте бесінші болып мәре сызығын қиды. Бұдан кейін талапты жас Францияда өткен 23 жасқа дейінгі шаңғышылар арасындағы Әлем чемпионатында күміс медальді жеңіп алды.
Бұған дейін Әлем кубогы кезеңдерінде атақты шаңғышы В.Смирнов қана бірнеше мәрте бірінші орынға табан тіреген. Алексей Смирновты ұстазым әрі пір тұтатын азамат деп санайды. Өткен жылдың 11-16 желтоқсанында Швейцарияның Давос қаласында шаңғыдан Әлем кубогы кезеңі басталды. Азия ойындары басталар алдында өзін бір рет сыннан өткізіп алуды көздеген А. Полторанин Давосқа келді. 15 шақырымдық классикалық үлгідегі жарыс жауапты әрі бап пен шыдамдылықты талап етеді. Алексей бабында болатын. Нәтижесінде жерлесіміз Әлем кубогының алтынын иеленіп, айды аспаннан шығарды. Арада В.Смирновтың 12 жылғы үзілісінен кейінгі жеңіс қайталанды.
Осыдан бір апта бұрын Алексейді Өскеменде жолықтырдық. Жанында бапкері бар. «Алтын медаль алу – арманым. Туринде жас болдым, тәжірибем жетпеді, Ванкуверде жол болмады. Сочиде есемді жібермеспін. Бақыттымын, жұбайым, белгілі биатлоншы, Азия ойындарының чемпионы Ольга Полторанина маған екінші сәбиді сыйлады. Медаль алып жатсам қызым, Кристина мен еліме сыйлаймын, деп шаңғы королі ағынан жарылды.
Оңдасын ЕЛУБАЙ,
«Егемен Қазақстан».
ӨСКЕМЕН.
