– Эльмира қырғыз балуанымен бұған дейін жарыстарда кездесіп, таза жеңіп жүрген. Бірақ осы жолы көрші елдің спортшысы біздің қызға арнайы дайындалып келгендей. Эльмира оған қарсы ештеңе жасай алмады. Өкінішті-ақ, – деген Гүзель Манюрова Эльмираның жеңісіне жаңа салмаққа ауысқаны кедергі болуы мүмкін дегенді алға тартты. – Риода 68 кило салмақта белдескен Сыздықова Токиода 76 килода кілемге шықты. Жеңілістің бір себебі осы да болуы мүмкін. Өйткені кейде қарсыласыңа физикалық жағынан күшің жетпей жатады. Әйтпесе, пандемия кезінде қиындықтарға қарамастан спортшыларымызға барлық жағдайды жасауға тырыстық. Алдағы уақытта кем-кетіктерді саралап, соған жұмыс істейтін боламыз.
Өз кезегінде Гүзель Манюрова пандемия жағдайына байланысты бір жыл кейінге шегерілген Олимпиадада мықты деген спортшылардың не үшін жарысты ерте аяқтап жатқанын айтты.
– Үш Олимпиаданың жүлдегері ретінде мен спортшыларды жақсы түсінемін. Алдымен, Эльмираға рахмет айтқым келеді. Әлемде үздік 16 спортшының қатарына еніп, Олимпиадаға әдеттегідей төрт жыл емес, бес жыл дайындалу қиынның қиыны. Спорттық деңгейіңді тағы бір жыл ұстап тұрғанда, өзіңнен кейінгілер Олимп додасына тыңғылықты дайындалуға, өз деңгейіне жетуге мүмкіндік алып қояды. Ерлер болсын, қыздар болсын келген балуандар физикалық тұрғыда мықты екені байқалып тұр. Барлығы жеңіске жеткісі, барлығы да жақсы нәтиже көрсеткісі келеді. Сол себепті де бұл жарыста Олимпиада чемпиондары мен жүлдегерлері сүрінді, – деді Г.Манюрова.
Келесі сөз Серік Сәпиевке берілді. Токиода спортшыларымыз ешқандай коронавируспен ауырмағанын, барлығының денсаулығы жақсы екенін айтқан комитет басшысы ширек финалда жеңіліс тапқан боксшы Әбілхан Аманқұл туралы да пікірін білдірді.
– Әбілханның қарсыласы осал емес еді. Бойшаң, ұрған соққылары дөп тиіп жатты. Кездесу алдында Әбілханның оң иығы шығып кеткенін білесіздер. Онымен қоса сол жұдырығы шытынап, көгеріп кеткен еді. Соған қарамастан боксшымыз тең дәрежеде жұдырықтасты. Негізі жеңуге болатын қарсылас еді, әттең ондай мүмкіндікті Әбілхан жіберіп алды, – деді С.Сәпиев.
