Аймақтар • 05 Тамыз, 2021

Мемлекеттік бағдарламалар бойынша 18 мың жаңа жұмыс орны ашылды

335 рет
көрсетілді
3 мин
оқу үшін

Жыл басынан бері Қарағанды облысында мемлекеттік бағдарламалар бойынша 18 мың жұмыс орны құрылды. Сондай-ақ, жаңа бизнес-идеяларды іске асыру үшін өңір тұрғындарына 685 грант берілді, деп хабарлайды Egemen.kz.

Мемлекеттік бағдарламалар бойынша 18 мың жаңа жұмыс орны ашылды

Бұл туралы Өңірлік коммуникациялар қызметі алаңында өткен онлайн-брифингте Қарағанды облысының жұмыспен қамтуды үйлестіру және әлеуметтік бағдарламалар басқармасы басшысының міндетін атқарушы төлеу Мұхтар мәлімдеді.

«Өз ісімен айналысқысы келетіндер үшін «Бастау бизнес» мемлекеттік бағдарламасы бар. Бұл бағдарлама бойынша кәсіпкерлік негіздерін оқып-үйрену және жаңа бизнес-идеяларды іске асыруға 583 400 теңге сомасында өтеусіз грант немесе жеңілдікті мөлшерлемелер бойынша микрокредит алуға болады. Осы жылдың 7 айында аталған жоба бойынша оқуға 1 538 адам жіберілді. Бағдарлама қатысушыларына 685 грант және 471 шағын несие берілді. Шағын несиелер негізінен мал шаруашылығына, өсімдік шаруашылығына, азық-түлік пен киім өндірісіне, халыққа қызмет көрсетуге, ТҚС ашуға, жолаушылар мен жүк тасымалына берілді», деді Төлеу Мұхтар.

Өңірде жұмыспен қамтуға жәрдемдесу шараларын көрсету үшін «Еңбек», «Жұмыспен қамтудың жол картасы» және басқа да бағдарламалар іске асырылуда. Биыл олар 75 мыңнан астам адамды қамтуды жоспарлап отыр. Оның ішінде «Еңбек» бағдарламасы бойынша 41 000 адамды, ЖҚЖК аясында – 800 адамды, басқа бағдарламалар бойынша – 33 700 жұмыссызды жұмысқа орналастыру жоспарлануда.

«7 айдың қорытындысы бойынша «Еңбек» бағдарламасы бойынша 25 мыңға жуық адам жұмыспен қамту шараларымен қамтылып, 21 мыңнан астам адам жұмысқа орналастырылды. Еңбек нарығында сұранысқа ие мамандықтар мен дағдылар бойынша қысқа мерзімді кәсіптік оқытуға 930 адам жіберілді. Жастар тәжірибесіне 653 адам орналастырылды, қоғамдық жұмыстарға 5 571 адам тартылды. «Бірінші жұмыс орны» бағдарламасы бойынша 80 адам жұмысқа орналасты. Барлық мемлекеттік бағдарламалар аясында 18 мыңнан астам жаңа жұмыс орны ашылды», деді Төлеу Мұхтар.

Халықтың әлеуметтік осал топтары да мемлекеттен қолдау алады. Облыс бойынша атаулы әлеуметтік көмек 3 521 отбасына көрсетілді. Кепілдендірілген әлеуметтік пакет 1 жастан 6 жасқа дейінгі 3 967 балаға тағайындалды. Сонымен қатар, АӘК алушыларға 2 566 дәрі-дәрмек қобдишасы берілді.

«Мүгедек адамдардың өмір сүру сапасын жақсарту үшін өңірде әлеуметтік қызметтер порталы құрылды, ол арқылы оңалту құралдары мен қызметтерін тікелей жеткізушілерден өз бетінше сатып алуға болады. Олар арнайы әлеуметтік қызметтерді ресімдей алады, оңалтудың техникалық құралдарына тапсырыс бере алады, ымдау тілі маманының, жеке көмекшінің, санаторий-курорттық емдеудің қызметтеріне жүгіне алады», деп атап өтті спикер.

Мемлекет тарапынан оңалтудың техникалық құралдары мен қызметтерінің құнын өтеу тетігі көзделеді. Портал қосымша тұтынушы қымбат тауарлар мен қызметтерді таңдаған кезде қосымша ақы төлеу мүмкіндігін қарастырады. 1 тамыздағы жағдай бойынша портал арқылы 19 335 техникалық оңалту құралдары мен қызметтеріне тапсырыс берілді, олардың 14 328-і орындалды. Сондай-ақ, осы жылдың шілде айында облыс тұрғындарына ыңғайлы болу үшін 1414 нөмірі бойынша бірыңғай Call-орталық ашылды, онда әлеуметтік портал жұмысы туралы сұрақтарға жауап алуға болады.

Соңғы жаңалықтар

Су үнемдейтін қондырғы

Технология • Кеше