Кеше Орталық коммуникациялар қызметінде Еуразиялық бизнес-форумға және кәсіпкерліктің дамуына арналған баспасөз мәслихаты болды. Онда шараны ұйымдастыру комитетінің төрағасы Қуаныш Дәуітов аталған форум 17-18 сәуірде Алматы қаласында өтетіндігін мәлімдеді.
Кеше Орталық коммуникациялар қызметінде Еуразиялық бизнес-форумға және кәсіпкерліктің дамуына арналған баспасөз мәслихаты болды. Онда шараны ұйымдастыру комитетінің төрағасы Қуаныш Дәуітов аталған форум 17-18 сәуірде Алматы қаласында өтетіндігін мәлімдеді.
Брифингке Мәжіліс депутаты және «Нұр Отан» партиясының кәсіпкерлікті дамыту мәселелері жөніндегі үйлестірушісі А.Соловьева, Қазақстанның ұлттық кәсіпкерлер палатасы басқарма төрағасының орынбасары Р.Ошақбаев, «Ғалымдардың Еуразиялық экономикалық клубы» қауымдастығының вице-президенті М.Курбенов және Еуразиялық бизнес-форумның ұйымдастыру комитетінің төрағасы Қ.Дәуітов қатысты.
Қазақстанда 1,5 миллион шағын және орта кәсіпкерлік субъектілері тіркелген. Қазіргі таңда оның 850 мыңы белсенді жұмыс істеп тұр. Халқымыздың белгілі бөлігі, атап айтқанда, еңбекке қабілетті 2 миллионнан астам азамат осы салада қызмет етеді, деді орталық коммуникациялар қызметінің ресми өкілі А.Әбибуллаев кіріспе сөзінде. Сөйтіп, мемлекеттік саясат пен ұлттық бәсекеге қабілеттілікті нығайтуда кәсіпкерліктің рөлі өсіп келе жатқанын айтты. Демек, кәсіпкерлікті қолдау – күн тәртібінде.
– Партия өзінің сайлауалды тұғырнамасында шағын және орта бизнесті дамыту бойынша нақты міндеттер алды. Партияда кураторлық институты құрылды. Бұл бірнеше бағытты қарастыратын жаңа институт. Тұғырнама міндеттерін біз индикаторлар жүйесі арқылы бағалайтын боламыз. Атап айтқанда, осындай индикаторлардың 3 деңгейін белгіледік. Олардың біреуі жаһандық сипатқа ие. Бұл әлемдік қауымдастықта және ұлттық деңгейде қабылданған өлшем – ішкі жалпы өнімнің құрылымында шағын және орта бизнес үлесінің қандай болатындығы. Ол индикатор, бизнес өзінің лайықты орнын алуы үшін оған қандай жағдай жасағанымыздың көрсеткіші іспетті. Екінші, ағымдағы индикаторлар. Біздің елімізде қазір қолданылып жүрген бағдарламаларды түзетіп, жаңа ұсыныстар енгізуге мүмкіндік береді. Үшінші, кіріктірілген индикатор. Ол арқылы бизнестің қаншалықты белсенді дамып жатқанын білуге болады, – деді депутат А.Соловьева.
Баспасөз мәслихаты барысында «Ғалымдардың Еуразиялық экономикалық клубы» қауымдастығының вице-президенті М.Курбенов пен Еуразиялық бизнес-форумның ұйымдастыру комитетінің төрағасы Қ.Дәуітов өзара келісім меморандумына қол қойды. Одан кейін тараптар екі ұйымның бірлесе отырып атқаратын жұмыстары туралы айтты. Елдегі шағын және орта кәсіпкерлікті дамыту мәселелеріне тоқталды.
– Еуразиялық бизнес-форумға дайындық жұмыстары бес айдан бері жүргізілуде. Бүгінде Қазақстандағы бизнес Еуразиялық экономикалық одаққа кірудің барлық мүмкіндіктерін толық бағалап үлгерген жоқ. Сондықтан, форумда осы және өзге де мәселелерді талқылап, кәсіпкерлерге пайдасы болатын түрлі шараларды қарастыру жоспарланып отыр. Қазақстанның және Кеден одағы елдерінің басшыларына шақырту хатын жолдадық, – деді Қ.Дәуітов.
Аталған бизнес форум 17-18 сәуірде Алматы қаласында өтеді. Себебі, еліміздегі кәсіпкерлердің басым бөлігі осы қалада шоғырланған, дейді ұйымдастырушылар. Осы жиында қаралған мәселелер мамыр айында өтетін Астана экономикалық форумы аясында жалғасын табады.
Нұрбай ЕЛМҰРАТОВ,
«Егемен Қазақстан».
