Әлем • 09 Тамыз, 2021

Грекияда мыңдаған адам эвакуацияланды

67 рет көрсетілді

Өрт сөндірушілер бірнеше күн бойы жойқын өртті сөндіруге тырысып жатыр. Грекияның әйгілі курорты және Криттен кейінгі екінші арал – Эбвей аралынан 2000-нан астам адам эвакуацияланды, деп жазады Egemen.kz ВВС-ге сілтеме жасап.

Фото Reuters

Демалыс күндері туристер мен Афинаның солтүстік-шығысында орналасқан Эбвей аралының тұрғындары пароммен материкке жеткізілді. Аралдағы үйлер өртеніп, электр сымдары зақымдалды.

Қазір Грекияда ондаған орман өрті өршіп тұр, бірақ олардың ішіндегі ең ауқымдысы Эбвей аралында болып жатыр. Демалыс күндері оларды сөндіру операциясына жүздеген өрт сөндіруші, әскерилер мен 17 ұшақ, тікұшақ тартылды.

«Бізде қазір екі өрт фронты бар: біреуі елдің солтүстігінде, екіншісі оңтүстігінде. Алда тағы бір қиын кеш пен тағы бір қиын түн күтіп тұр», деді Грекия азаматтық қорғау министрінің орынбасары Никос Хардалиос. 

Ол Афинада жағдай жақсарғанын, бірақ құрғақ желдің күшеюіне байланысты өрт қайта өршуі мүмкін деген қорқыныш барын айтты.

Осы аптаның басында орманда шыққан өрт Афинаға жақындап, көшелерді қатты түтін басып, бірнеше үй өртеніп кетті. Жұма күні кешке билік астананың солтүстік маңындағы тұрғындарды жаппай эвакуациялады.

Грекияда бір апта бойы аптап ыстық болды. Елдің кей жерлерінде ауа температурасы 47 градусқа дейін жетті. Енді термометр 40-тан төмендеген. Алайда елдегі ауа температурасының осыншалық көтерілуі шамамен 30 жыл бойы байқалмаған.

Еуропалық орман өрттерінің ақпараттық жүйесінің хабарлауынша, Грекияда шыққан өрт 56 мың гектар аумақты қамтыды.

Биылғы жазда орман өрті Грекия, Албания, Болгария, Солтүстік Македония мен Түркияда, сондай-ақ АҚШ-тың Калифорния штатында шықты.

Якутиядағы өрт, ресми мәліметтер бойынша, қазірдің өзінде 6 миллион гектарды шарпыған. Онда 150-ден астам орман өрті шыққан. Оны сөндіруге мыңдаған адам, жүздеген техника тартылды.

Сенбіде Якутияның орталық бөлігіндегі Бяс-Кюэль ауылында 30-дан астам үй өртеніп, тұрғындары қауіпсіз жерге көшірілді.

Жексенбіде билік Калвица мен Харыялах ауылдарының тұрғынын эвакуациялады.

Соңғы жаңалықтар

Доллар қымбаттады

Қаржы • Бүгін, 15:55

Ұқсас жаңалықтар