Грантқа үміткерлердің өтінімін комиссия мүшелері қарайды. Комиссия құрамына мемлекеттік органдар мен қоғамдық ұйымдардың өкілдері, журналистер, «Қазақстан студенттері Альянсы», Отандастар қорының өкілдері кірді. Одан кейін талапкерлердің ҰБТ-да жинаған балдарына және бекітілген ережелерге сәйкес конкурстық негізде гранттар тағайындалатын болады.
Президенттің тапсырмасы бойынша гранттардың жалпы саны 5 мыңға артып отыр. Яғни, өткен жылы білім беру гранттарының саны 51 мың болса, биыл 56 мыңға дейін артты. Сондай-ақ грант бөлу кезінде алғаш рет азаматтардың әлеуметтік осал санаттары үшін квота көзделген.
Биыл білім беру грантын тағайындау конкурсына қатысу үшін барлығы 75 мыңнан астам өтінім түсті, бұл 2020 жылмен салыстырғанда 13 мыңға артық.
Мемлекеттік білім беру грантын тағайындау конкурсының нәтижесін 15 тамызға дейін жариялау жоспарланып отыр.
