Шахтинск қалалық жастар ресурстық орталығының жетекшісі Жасұлан Хамитов бұл игі істің туған қаланың 60 жылдық мерейтойына жасалған тарту екенін айтады.
– Биыл біздің қаламызда үш көпқабатты үйдің қабырғасына мурал салынды. Осыны көргеннен кейін біз сурет авторларымен байланысқа шығып, басты көшеміз Абай Құнанбаев даңғылындағы трансформатор будкасын безендіріп берулерін өтіндік. Жастар біздің идеямызды қолдап, қосалқы стансаның қабырғаларына суретті тегін салып берді, – дейді ол.
Қаланың шырайлана түсуіне үлесін қосқан суретшілерге жастар орталығы аумақты ретке келтіріп, қажетті материалдармен қамтамасыз етіп, қолдан келген көмектің бәрін көрсеткен. Жасұлан Хамитов бұл идеяны жергілікті талантты жастар қолдап, алдағы уақытта Шахтинск қаласының барлық трансформаторлық қосалқы стансасы әдемі кейіпке енеді деп үміттенеді.
Сонымен қатар ол қаладағы талантты жастарды Шахтинск шаһарын шырайландыруға барынша атсалысуға шақырды. «Біз сіздерді және сіздердің идеяларыңызды талқылауға, оларды қарастыруға және жан-жақты қолдауға дайынбыз», – дейді кеншілердің шағын қаласындағы жастардың жетекшісі.
Қарағанды облысы,
Шахтинск қаласы
