Аяқ астынан дейін десек, әнеугүні тіреуі ажырап кеткен. Ол туралы әлеуметтік желіде жергілікті жұрт жарыса жазысқан. Тіпті фотосуретіне дейін жүктеген. Алайда жұрттың дабылына құлақ түрген бір басшы болмады. Сол кезде көздерін шұқып тұрып көрсеткен ақауға басшылардың бірі мән берсе, бұлайша опырылып жатпас еді. Абырой болғанда, бала-шаға өтіп бара жатқанда құламаған. Әйтпесе, қаусап тұрған көпірдің үстінен адам аяғы үзілмейді. Ары-бері сабылысқан көлік те көп. Айтпақшы, баяғыда да беткі жабындысы ойылып қалып, автобустың дөңгелегі түсіп кеткен екен.
Семейдегі қоғам белсенділерінің айтуынша, көпір 1997 жылдан бері апаттық жағдайда тұр екен. Ол уақытта оң жағалау мен Жаңа Семейді жалғап жатқан жалғыз көпір-тұғын. Кейін 2001 жылы жаңа аспалы көпір түсіп, ескі көпірге түсетін салмақ азайған. Десе де, елу жылғы ескі өткел елге қауіп төндірмей тұрған жоқ.
Осы жолы көпір опырылып түсе сала, қала басшылығы оқиға орнына жеткен. Көпірдің қаңқасы бүтін дегендей пікірге келген олар қауіпсіздік үшін көпірді уақытша жапқан. Алдағы күндері арнайы мамандар көпірді толықтай тексеріп, бір қорытындыға келеді. Дұрысы, жазатайым жағдай болмай тұрғанда, күрделі жөндеу керек шығар.
Шығыс Қазақстан облысы
