«Өкінішке қарай, елордада коронавирус инфекциясын жұқтыру деңгейі бәсеңдемей тұр. Нұр-Сұлтан қаласы эпидемиялық жағдайға байланысты «қоңыр қызыл аймақтан» шығып, «қызыл аймаққа» өтті. 11 тамыздағы жағдай бойынша инфекциялық стационарларда 2 699 науқас жатыр, осылайша жүктеме 69%-ды құрап отыр. Орташа есеппен тәулік ішінде 300-ге дейін адам ауруханаға жатқызылады. Стационарларда 3 900-дан аса төсек-орын бар. Қазіргі уақытта қала бойынша 16 инфекциялық стационарда 7 мыңға жуық медицина қызметкері індетпен күресіп жатыр», деді Т.Мұратов.
Сондай-ақ басқарма басшысы бүгінде жедел жәрдем бригадалары, 103 қызметі және бастапқы медициналық санитариялық көмек беру ұйымдарындағы мобильді бригадалардың жұмысы қарқын ала түскенін айтты. Бастапқы медициналық санитариялық көмек беру ұйымдарында 12 мыңнан аса науқас коронавирус инфекциясынан ем алып жатыр. Қала әкімнің тапсырмасымен мобильді бригадалардың саны 300-ге дейін көбейтілді.
«Ересектерден бөлек, коронавирус ауруы балалардың арасында да кездеседі. Қазіргі таңда елордада 74 бала стационарда ем қабылдап жатыр, оның ішінде 7 баланың жағдайы ауыр. Өткен тәулікте 12 бала ауруханаға түсті. Ал 834 бала амбулаторлы түрде ем алып жатыр», деді Тимур Мұратов.
Басқарма басшысының мәліметінше, елордада жыл басынан бері коронавируспен 10 мыңнан аса бала ауырып шықты.
«Вирусты жұқтырушылар жаз мезгілінде көбейіп отыр. Маусым айынан бастап балалар вирустың айқын клиникалық белгілерімен түсе бастады. Бұл улану, қалтырау, дене қызуының көтерілуі сияқты көріністер де болуы мүмкін. Балалардың отбасындағы екпе алмаған адамдармен байланыстан соң ауыра бастағанын атап өткім келеді. Яғни вакцина алмаған азаматтар вирусты өз балалары мен жақындарына жұқтырады», дейді ол.
Елордада 366 мыңнан аса адам коронавирус індетіне қарсы вакцинаның бірінші компонентін алды. Бүгінде 284 мыңнан астам азамат толық иммундаудан өтті. Халықтың вакцина алуын қамту мақсатында медицина ұйымдарында, сауда орталықтарында екпе егу бекеттерінің жұмыс кестесі жексенбі мен мереке күндерін қоса алғанда сағат 10.00-ден 22.00-ге дейін ұзартылды. Сондай-ақ елордада 8 сауда ойын-сауық орталығында (Хан-Шатыр, MegaSilkWay, Керуен, Абу-Даби Плаза, Азия Парк, Сарыарқа, Еуразия, Мечта дүкені) вакцина алу бекеттері жұмыс істеп тұр. Қазіргі кезде сауда және ойын-сауық орталықтарында барлығы 60 мыңға жуық адам вакцина алды.
Т.Мұратов соңғы уақытта халықтың вакцина алу белсенділігі байқалатынын, адамдар өз денсаулығымен қатар айналасындағылардың да саулығы туралы саналы түрде ойлана бастағанын атап өтті.
