Аймақтар • 16 Тамыз, 2021

Үңгірдегі үлгілі іс

250 рет
көрсетілді
2 мин
оқу үшін

Балқаш қаласының маңындағы табиғаты таңғажайып Бектау ата тауы еліміздегі киелі нысандар мен басқа да ерекше қастерленетін табиғи мұра ескерткіштерінің картасына кіреді. Мұнда 600 метр биіктікте орын тепкен Әулие ата үңгірі бар. Бұл жерге жұрт көптеп келеді.

Үңгірдегі үлгілі іс

 

Өкінішке қарай, тәртіпсіз туристер ұзақ жылдардан бері осы үңгірдің аузы мен маңайын неше түрлі жазуларға толтырып, табиғат кереметінің сәнін келтіріп келген еді.

Өткен жылы осы кемшілікті жою мақсатында Шашубай кентінің бө­бекжай кешені базасындағы ре­сурс­тық орталықтың педагогтері мен  мамандары және техникалық қыз-­
меткерлері киелі үңгірді жабайы жазбалардан тазарту жөнінде шешім қабылдаған болатын.

Енді, міне, бес ай бойы тынымсыз тер төккен олар өздерінің діттеген мақсаттарына жетті. «Рухани жаң­ғыру» бағдарламасы аясында өткен бұл акция туралы өзінің фейсбук парақ­шасына жоба жетекшісі, об­лыстық мәслихаттың депутаты Айман Түкбаева былай деп жазды: «Дема­лыс және мереке күндері бел­сенді азаматтарымыз жүрек қала­уымен Бектау ата шатқалына ба­рып, үңгірді тазартты. Олар өздері­мен бірге тұрмыстық оттегі баллонын, дизельді шағын автономды гене­раторлық электр стансасын, электр щеткалары мен кескіштерін, өрт саты­ларын, туристік жабдықтар мен арқан­дарды, отпен жұмыс істеу­дегі жеке қауіпсіздік заттарын, құры­лыс құралдарын ала барып, тазалау жұмыстарымен айналысты. Акция ресми түрде 6 тамызда аяқталды».

Игі іс біткеннен кейін белсенді аза­маттар үңгірдің алдына қазақ, орыс және ағылшын тілдерінде жа­зыл­ған ақпараттық баннерлер мен «Табиғат мінсіз таза, мін бізде ғана» деген жазуы бар ескерткіш тақта орнатты.

 

Қарағанды облысы