Кеше Орталық коммуникациялар қызметінің мінберінде «Қазақстан-2050» жалпыұлттық қозғалысының бір топ мүшелері Президент Н.Назарбаевтың «Қазақстан жолы – 2050: бір мақсат, бір мүдде, бір болашақ» атты Жолдауына сәйкес өздерінің ойларын айтып, журналистерге брифинг берді.
Кеше Орталық коммуникациялар қызметінің мінберінде «Қазақстан-2050» жалпыұлттық қозғалысының бір топ мүшелері Президент Н.Назарбаевтың «Қазақстан жолы – 2050: бір мақсат, бір мүдде, бір болашақ» атты Жолдауына сәйкес өздерінің ойларын айтып, журналистерге брифинг берді.
Кездесуді қозғалыс төрағасы Данат Жумин ашып, жүргізіп отырды. Алдымен ол қозғалыстың өткен жылдың 6 желтоқсанында дүниеге келгенін айтып өтті. Оның мақсаты Елбасының «Қазақстан-2050» Стратегиясын іске асыру жолында жастардың күші мен білімін біріктіруге бағытталған. Оған түрткі болған Президенттің «Болашақ» стипендиясының 20 жылдығына арналған форумда айтқан сөзі екен. Сонымен бірге, бұл қозғалысқа «Болашақ» стипендиясы арқылы оқымаған жастарды да тарттық. Біздің қозғалысымыз қатардағы қоғамдық емес, жүйелі түрде құрылған ұйым, деді ол.
Одан әрі Д.Жумин қозғалыстың бүгінгі күнге дейін атқарып жатқан жұмыстары туралы айтты. Біздің ең басты жұмысымыз Президенттің Стратегиясын халыққа түсіндіру, оның аса зор мақсатын ашып көрсету болып табылады. Оны іске асыруға әрбір азаматтың қатысуының маңызды екенін халыққа жеткізуге тырысудамыз. Бұл құжат біздің болашақ ұрпағымыздың жарқын өмір сүруіне қажетті бағдаршам екенін әрбір қазақстандыққа ұғындырып, оның қаншалықты тереңдікті қамтитынын жеткіземіз. Өзінің және ұрпағының болашағын Қазақстанмен байланыстырғысы келетін әрбір азамат үшін бұл Стратегияның орындалуы өте маңызды. Біз соны халыққа ұғындыру жолында еңбек етіп келеміз, деді шешен.
Екінші болып сөзді жас бизнесмен, қозғалыс белсендісі Мұхтар Манкеев алды. Ол да қозғалыстың мақсатына тоқталды. Біздің мақсатымыз Елбасы Н.Назарбаевтың «Қазақстан-2050» Стратегиясын қолдау арқылы елімізді дамыған 30 елдің қатарына енгізуге атсалысу болып табылады. Біздің барлық қызметіміз осы іске жұмылдырылған дей келіп, ол 2014 жылғы нақты жұмыстар туралы айтты.
Сөз кезегі өзіне тигенде белгілі балалар кардиохирургі Дмитрий Горбунов Жолдаудың денсаулық сақтау саласы туралы айтылған бағыттарына тоқталып, онда көтерілген мәселелердің өзінің көңілін көншіткенін атап өтті. Мәселен, Президенттің Қазақстанда медициналық туризмнің белсенді түрде дамығанын қалайтыны өте орынды екенін жеткізді. Бұл біздің медицинамыздың көрші елдерге қарағанда, жоғары деңгейге көтерілуіне мүмкіндік беріп, сол елдер азаматтарының Қазақстанда емделіп, осында ота жасатуға тырысушылығын арттырар еді, деді шешен.
Одан әрі Д.Горбунов өздерінің клиникаларындағы жұмыстарға тоқталып, оған жақын шетелдерден де пациенттердің көптеп келе бастағанын тілге тиек етті. Сөзінің қорытындысында Президенттің қазақстандықтардың орташа жасы 80-ге жетуі жолында қызмет ету керектігі туралы айтқаны өте орынды екенін атап өтті.
«Қазақстан-2050» жалпыұлттық қозғалысының бір белсендісі Ұлттық биотехнология орталығының қызметкері, жас ғалым, генетик Айша Ысқақова екен. Сөз кезегі өзіне тигенде ол Жолдауда ғылымға өте көп көңіл бөлгеніне тәнті болғанын жеткізді. Ғылым саласындағы ізденістерді қаржыландыру көлемі ІЖӨ-нің 3 пайызы көлеміне жеткелі отырғаны ғылым жолындағы жастардың белсенділігін арттыра түсері сөзсіз. Ғылыми жолмен дамитын экономикаға тек осындай қамқорлықпен ғана қол жеткізуге болады. Соның ішінде агроөнеркәсіптік кешеннің дамуына да ғылыми жетістіктерді пайдаланудың маңыздылығы туралы көптеген ойлар жасалды. Енді Жолдаудағы осы талаптардың бәрі де іске асырылады деген үміттеміз, деді жас ғалым.
Брифингтің соңында жиналғандар журналистердің көптеген сұрақтарына жауап берді.
Жақсыбай САМРАТ,
«Егемен Қазақстан».
