Көлік салығы бойынша жалпы берешек сомасы 21,5 млрд теңгені құрады, оның ішінде негізгі сомасы – 17,5 млрд теңге, өсімпұлдар – 3,9 млрд теңге.
263 802 жеке тұлғаның мүлік салығы бойынша берешек 1,1 млрд теңгені құрады, оның ішінде негізгі сомасы – 877,1 млн теңге, өсімпұлдар - 269,9 млн теңге.
Сонымен қатар, 261 801 жеке тұлғаның жер салығы бойынша қарызы 409,5 млн теңгені құрады, оның ішінде негізгі сомасы –282,7 млн теңге, өсімпұлдар - 126,8 млн теңге.
Салық заңнамасы кешіктірген әрбір күн үшін өсімпұл есептеуді қарастырады, ал айыппұлдарды қолдану заңда көзделмеген.
«Салық міндеттемесі орындалмаған жағдайда, салық органдары берешекті мәжбүрлеп өндіріп алуды қамтамасыз ету үшін заңнамада көзделген әдістерді қолдануға міндетті.
Бұл ретте салық заңнамасы банктердің төленбеген қарызы бар заңды тұлға, жеке кәсіпкер, жеке тұлғаларға шот ашудан бас тарту міндеттемесін көздейді», деп жазады ведомство.
Бұл ереже мемлекеттік бюджеттен және Мемлекеттік әлеуметтік сақтандыру қорынан төленетін жәрдемақылар мен әлеуметтік төлемдерді алуға арналған банктік шоттарға, білім беру жинақ салымы шарты бойынша банктік шоттарға қолданылмайды. Егер жеке тұлға банк шотын осы мақсатта ашса, оның салық берешегі болса да, банк бас тартуға құқылы емес.
Бұдан басқа, Салық кодексіне 1 АЕК-тен артық мөлшердегі салық төленбеген жағдайда, хабарлама жіберіледі. Содан бастап отыз жұмыс күні ішінде берешек төленбесе, салық органы сәйкес бұйрық шығарып, аймақтық жеке сот орындаушылар палатасына немесе әділет органдарына мәжбүрлеп орындау үшін жібереді.
