Ақтөбе қаласындағы «Достық» үйінде Ақтөбе облысы Қазақстан халқы Ассамблеясы кеңесінің кеңейтілген отырысында Елбасы Нұрсұлтан Назарбаевтың «Қазақстан жолы – 2050: бір мақсат, бір мүдде, бір болашақ» атты Қазақстан халқына Жолдауын талқылау өткізілді. Оған кеңес мүшелері, облыстағы 18 этномәдени бірлестіктердің төрағалары мен өкілдері қатысты. Отырысты Ақтөбе облысы Қазақстан халқы Ассамблеясы хатшылығының меңгерушісі Қыдырғали Ермұханов қысқаша сөз сөйлеп ашып, Жолдаудың ел дамуының жарқын болашағын айқындаған бағдарламалық құжат болып табылатынына тоқталды. Ол Жолдаудың «Қазақстан-2050» Стратегиясында айқындалған ерекше ауқымды міндеттерді жүзеге асыру жолдарын ашып, дамыта түсетінін атап өтті.
Ақтөбе қаласындағы «Достық» үйінде Ақтөбе облысы Қазақстан халқы Ассамблеясы кеңесінің кеңейтілген отырысында Елбасы Нұрсұлтан Назарбаевтың «Қазақстан жолы – 2050: бір мақсат, бір мүдде, бір болашақ» атты Қазақстан халқына Жолдауын талқылау өткізілді. Оған кеңес мүшелері, облыстағы 18 этномәдени бірлестіктердің төрағалары мен өкілдері қатысты. Отырысты Ақтөбе облысы Қазақстан халқы Ассамблеясы хатшылығының меңгерушісі Қыдырғали Ермұханов қысқаша сөз сөйлеп ашып, Жолдаудың ел дамуының жарқын болашағын айқындаған бағдарламалық құжат болып табылатынына тоқталды. Ол Жолдаудың «Қазақстан-2050» Стратегиясында айқындалған ерекше ауқымды міндеттерді жүзеге асыру жолдарын ашып, дамыта түсетінін атап өтті.
Отырыста сөз алған «Эллада» грек этномәдени» қоғамдық бірлестігінің төрағасы Ян Липириди Елбасы Жолдауының мәні мен маңызына тоқтала келіп, оның қазақстандықтардың бақуатты тұрмысын қамтамасыз етуге өзек болған бағыттарын тарқата әңгімеледі.
– Жолдау тақырыбы мен «Қазақстан-2050 Стратегиясы: бір халық – бір ел – бір мүдде» атты Мемлекет басшысының Қазақстан халқы Ассамблеясының ХХ сессиясындағы сөзінің бірізділігін көреміз. Біз бұдан Елбасының гүлденген Қазақстанды қалыптастыру, қуатты мемлекет, дамыған экономика және жалпыға ортақ еңбекті пайдалана отырып, берекелі қоғам құру жолындағы сарабдал саясатының жасампаздығын аңғарамыз. Елбасының бұл жолғы Жолдауының алтын арқауы да халықтың тұрмысын жақсартуға, ұлтаралық татулық пен бірлікті нығайтуға, сондай-ақ, Жалпыға Ортақ Еңбек Қоғамын құруға бағытталған баянды бағдарламаларды құрайды. Онда тәуелсіздік жылдары жүріп өткен қазақстандық жолдан туындаған «Мәңгілік Ел» ұлттық идеясы жария етілді. Ортақ Отанымыз – Қазақстанның гүлденуінің іздері айқындалған. «Мәңгілік Ел» идеясының жеті қағидасы біздің дамуымыздың базалық құндылықтарын, халқымыздың ортақ мүддесі мен тарихи тағдырын айшықтайды, – деді Ян Липириди.
Ол сондай-ақ, Жолдауда Қазақстанның әлемнің дамыған отыз елінің қатарына ену жоспары айтылғанын, ішкі жалпы өнімді 4,5 есеге, жан басына шаққанда 13 мың АҚШ долларынан 60 мың АҚШ долларына жеткізу көзделіп отырғанын жеткізді. Елбасы Жолдауында дәрігерлер мен мұғалімдердің еңбекақысын көтеру туралы мәлімделгенін де жағымды жаңалық ретінде баяндады.
– Біз Елбасының әр жылдарғы Жолдауын асыға күтеміз, оған үлкен сенім артамыз. Шыны керек, Нұрсұлтан Әбішұлының сөзі мен ісі қамшының егіз өріміндей жымдасып жатады. Жолдауда айтылған міндеттерді жүзеге асыруға деген халықтың патриоттық сезімі де жоғары. Мен Елбасының биылғы Жолдауын ерекше ықыласпен тыңдадым. Онда қазіргі қол жеткен табысымызды толықтыра түсудің іздері нақты көрсетілген. «Мәңгілік Елді» нығайту – Қазақстанның тәуелсіздігін нығайту деп түсінеміз. Сондықтан ұлтаралық келісім мен достықтың тінін бекіте береміз. Бұл жарқын болашақтағы жасампаз істеріміздің тұғыры болатыны сөзсіз, – дейді «Әзербайжандар ассоциациясы» республикалық қоғамдық бірлестігі Ақтөбе қалалық филиалы кеңесінің төрағасы Шаһбаз Жамалов.
Отырысқа қатысушылар Елбасы Нұрсұлтан Назарбаевтың «Қазақстан жолы – 2050: бір мақсат, бір мүдде, бір болашақ» атты Қазақстан халқына Жолдауын бірауыздан қолдайтындарын білдірді. Жолдауды қолдау, насихаттау және жүзеге асыруға байланысты Ақтөбе облысы Қазақстан халқы Ассамблеясының өңір тұрғындарына үндеуін қабылдады.
Сатыбалды СӘУІРБАЙ,
«Егемен Қазақстан».
Ақтөбе облысы.
