• 21 Қаңтар, 2014

Өзіндік пәрмені бар

Жылдың басты құжатын көгілдір экран арқылы Елбасының өз аузынан естіп, мұқият тыңдадым. Шиырып айтқанда, «Қазақстан-2050» Стратегиясының алға қойған міндеттерін жан-жақты талқылап, көп жағдайда екінің бірі жете түсіне бермейтін жайттарды ұғындырды. Бұл елге ең керекті құндылық еді. Екіншіден, ағымдағы жылы елімізде атқарылатын жұмыстар бойынша нақты тапсырмалар берді. Бұл дегеніміз, аты айтып тұрғандай, «Қазақстан жолы – 2050» деген бас құжаттың өзіндік ерекшелігін, өзіндік пәрменділігін, өзіндік маңыздылығын білдіреді.

Қызмет бабына сәйкес, осынау құндылықтарды халыққа жан-жақты түсіндіру үшін сол елмен сан мәрте талқылаймыз. Сөйтіп, өңірдің өркендеуіне өзіндік үлесімізді қосуға талпынамыз. Негізі ауыл шаруашылығы саласының маманы болғандықтан және аграрлы облыста еңбек етіп жүргендіктен, ел газеті мүмкіндігін пайдалана отырып, Жолдаудағы Қазақстан тарихына енетін 10 креативті идеяның ауыл шаруашылығы туралы айтылған төртіншісіне аз-кем тоқтала кетсем деймін.

«Аграрлық ғылымның, оның ішінде гендік жаңғыртылған дақылдар әзірлеудің арқасында Қазақстан өңірлік ірі ауыл шаруашылығы өнімдерін экспорттаушылардың біріне айналады», деп нақтыланған Жолдауда. Бұл идея нақты өмірден алынғандықтан, өміршең болып жылдам жүзеге асатындығына сенімдімін. Олай дейтінім, бүгінде біздің өңірде мал тұқымын асылдандыруға баса назар аударылып, ең бастысы – атакәсіпті жалғаушы ұрпақ ет бағытындағы, сүт бағытындағы ірі қараны ерекше күтімге алған. Пайдасы шаш етектен екендігін білгендіктен, бағымындағы малының өсуіне барлық жағдайды жасап отырған малсақ жандар әрекетіне риза боласыз.

Аудандық мәслихаттың кезекті сессияларында күн тәртібіне сәйкес мал тұқымын асылдандыруға қатысты мәселелер қызу талқыланып, мемлекеттік саясатқа сай оң шешім қабылданып тұрады. Сондықтан енді Жолдау мәтінін қолымызға алып, алыстағы ауылдарға арнайы барып, ондағы тіршілікпен ұштастыра қарапайым халықтың түсінбеген тұстары болса, түсіндіріп әрі Жолдауды талқылауды төл міндетіміз ғана емес, Ел мен Елбасы алдындағы азаматтық парызымыз санаймыз.

Бақыт СМАЙЫЛ,

Қаратал аудандық мәслихатының хатшысы.

Алматы облысы.

Күннің маңызды және өзекті жаңалықтарын «Егемен Қазақстан» телеграм каналынан оқыңыз