Кездесу барысында Нұрсұлтан Назарбаев екі мемлекет арасындағы ынтымақтастықтың жоғары деңгейін атап өтті.
«Қазір біз қиын кезеңді бастан өткеріп жатырмыз. Қазақстан мен Ресей коронавирустың таралуы мен оның экономикаға әсерімен байланысты қиындықтарды бірлесіп жеңіп келеді. Біз жақында Владимир Путинмен кездестік. Біз жұмысты жалғастырамыз», деді Елбасы.
Қазақстанның Тұңғыш Президенті екіжақты қатынастарды одан әрі нығайту және Еуразиялық экономикалық одақ аясындағы аймақтық ынтымақтастықты дамыту мәселелеріне тоқталды.
Михаил Мишустин Нұрсұлтан Назарбаевқа жылы қабылдағаны үшін алғысын білдіріп, Ресей Федерациясы Президентінің ізгі тілегін жеткізді. Қазақстанға сапары барысында жүргізілген келіссөздер мен кездесулердің нәтижесі туралы айтты.
«Біз екіжақты күн тәртібін белсенді түрде талқыладық. Айтайын дегенім, осы жылдың бірінші жартыжылдығында елдер арасындағы тауар айналымы 34%-ға өсті. Пандемияға дейінгі деңгейден 20%-ға арттырдық. Жыл соңына дейін 20 миллиард доллардан асатын көрсеткішке қол жеткізгіміз келеді», деді М.Мишустин.
Ресей Премьер-Министрі Қазақстанның цифрландыру саласындағы шешімінен алған әсерімен бөлісті. Сонымен қатар коронавирус инфекциясының таралуына қарсы бірлескен шараларды жүзеге асыруға тоқталды.
«Кеше әріптестерім «электрондық үкіметке» ұйымдастырған орталықты көрсетті. Өте қызық жұмыстар. Шынын айтқанда, біз өзара ашықпыз, біз де Ресей үкіметінің үйлестіру орталығында не істегенімізді көрсетеміз. Бірақ кеше мен сіздердің ең заманауи шешімдерді қаншалықты жылдам енгізіп жатқандарыңызға таң қалдым. Коронавирусқа қатысты біз бұл қиын инфекциямен күресу үшін қолдан келгеннің бәрін жасаймыз. Бүгінде «Спутник V» Қарағанды фармацевтикалық зауытында шығарылады. 5 миллионнан астам доза өндірілді. Бұл өте ауыр жұмыс. Қорытындылай келе, бауырластық тату көршілік қарым-қатынасымызды жоғары бағалайтынымызды атап өткім келеді. Біз екіжақты ынтымақтастығымызды да, ЕАЭО аясындағы қарым-қатынасты да барынша дамытуға ниеттіміз», деді М.Мишустин.
