Екі қала да, жергілікті тайпалар, фермерлер, муниципалды және өнеркәсіптік пайдаланушылар да суды Орталық Аризона жобасы арқылы тұтынады. Аталған жоба каналдар мен акведуктар жүйесінен құралған. Жалпы алғанда, Калифорниядан бастап Вайомингке дейінгі аймақты мекендейтіндер, тіпті Мексика халқы осы өзен суына тәуелді. Қысқасы, өзен шамамен 40 млн адамды тіршілік нәрімен қамтамасыз етіп отыр.
Өткен аптада АҚШ-тың мелиорация бюросы Мид көліндегі қуаңшылық туралы ресми түрде жариялады. Осылайша, Гувер бөгетіндегі су деңгейі азайған. Колорадо өзенінің де суы тартылып барады. Болжамға сүйенсек, келер жылы көлдегі су тағы 30 пайызға азаймақ.
Бірақ ғалымдар тағы бір ыстық жаз болса, Мидтің суы толарсақтан ғана келуі мүмкін екенін айтып отыр. Қазіргі таңда су қоймасының маңызы зор. Ол Аризона, Калифорния және Невада штаттарын сумен ғана қамтамасыз етіп қоймай, аталған штаттарға қажетті электр энергиясын өндіреді.
Әдетте дамба толы болғанда өндірілген тоқ 8 млн тұрғынды қамтуға жететін. Бірақ судың азаюы электр энергиясы өндірісінің баяулауына әкеп соғып отыр. Соның салдарынан Мидтің өндіріс көлемі 25 пайызға азайған.
