Шымкент қаласы бойынша бекітілген 18 инватакси мүмкіндігі шектеулі жандарды қала ішіндегі қалаған мекенжайына тегін апарады. Мәселен, жұмыс, оқу орнына, медициналық мекемелерге, әуежай, теміржол вокзалы және т.б. белгіленген пункттерге жеткізеді. Инватакси қызметіне жүріп-тұруы қиын бірінші, екінші топ пен 16 жасқа дейінгі мүгедектігі бар азаматтар жүгіне алады.
Бекітілген автокөліктер жылжымалы құрылғымен және кресло-арбаларды орнатуға арналған құралдармен жабдықталған.
«Мен 2-ші топ мүгедегімін, Инватаксидің көмегімен күнде жұмысқа барамын. Мемлекеттен беріліп жатқан инватакси – қолайлы, қолжетімді. Тек өтінішті 1 күн бұрын қалдыру керек. Өтініш қабылданған соң қалаған жеріңе тегін баруға болады. Осы секілді көмек түрлерін алып жатқанымызға алғысымыз шексіз», дейді қала тұрғыны Мейіржан Құттықбай.
Айта кетейік, инватакси қызметі жыл басынан бері 500-ден астам азаматтан өтінім қабылданған. Күніне 200-ге жуық тапсырыс түседі. Өтініш беруші 1 күн бұрын диспетчерге (8 (7252) 57-70-06) хабарласып, тапсырыс қалдыра алады.
