Ғарыштық түсірілім тобының ұшуға дайындық барысы Ресейдің бірінші арнасының Роскосмоспен бірігіп шығаратын телевизиялық жобасында айтылды.
Ғарыш кемесінің командирі, ресейлік ғарышкер Антон Шкаплеров, актриса Юлия Пересильд, режиссер мен оператор Клим Шипенко ғарышқа ұшатын жеке скафандрларда жаттығу жүргізіп жатыр.
«Ұшуға бір айдан аз уақыт қалды. Түсірілім тобы ғарыш станциясында 12 күн болады. Олар осы уақыт ішінде фильмнің үштен бір бөлігін түсіру керек. Бұл шамамен 40 минуттық сюжетті қамтиды. Ғарыштағы түсірілім кестесінің ғана емес, әр сағаты жоспарланып, Дмитрий Рогозинмен кездесуде талқыланды», деді Жұлдызды қаладағы ғарышкерлерді даярлау орталығының тележүргізушісі.
Роскосмос басшысы Дмитрий Рогозин Илон Маскты, Ричард Брансонды және Джефф Базосты Байқоңыр ғарыш айлағынан басқарылатын ұшуды бақылауға шақырды.
«Бүгін мен біз құрметтейтін Илон Маск мырзаға шақырту жіберемін. Әрине, біз Брансон мырзаны, Безос мырзаны шақырғымыз келеді. Егер ғарыштық энтузиастардың керемет үштігі біздің жобаны және ғарыш кемесін ұшыру кезінде Байқоңырда болса, менің ойымша, бұл ғарыш бірегей адамдар кездесетін ерекше орта екендігіне және барлық проблемаларға қарамастан, күш біріктіруге ықпал етеді», деді Роскосмос басшысы.
