Қазақстан • 26 Тамыз, 2021

Дортмундта Қазақстан Республикасының құрметті консулдығы ашылды

Солтүстік Рейн-Вестфалия федералдық жерінде Қазақстан Республикасының құрметті консулының Бюросы ашылды, деп хабарлайды Egemen.kz.

Ботакөз БАҚБЕРГЕН

Құрметті Консул лауазымына «WILO SE» компаниясының Басқарма Төрағасы және президенті, герман экономикасы Шығыс комитетінің төрағасы Оливер Гермес тағайындалды.

Жаңа Құрметті консулға консулдық патентті ҚР ГФР-дағы Елшісі Дәурен Кәріпов ресми түрде табыс етті. Дортмунд қаласында өткен салтанатта сөз сөйлеген Елші Д.Кәріпов О.Герместің жеке және кәсіби қасиеттері мен беделін ерекше атап өтті.

Жаңа қазақстандық Құрметті консул «Wilo Group» компаниясының Басқарма Төрағасы болып табылады, ол Алматы облысында қуаты жылына 2 000 бірлік сорғы шығаратын зауыттың құрылысына инвестиция салған. Қазақстан нарығында кеңінен таралған «Wilo» сорғылары коммерциялық және әкімшілік ғимараттарда: министрліктерде, «Бәйтерек» монументінде, Алматы қаласындағы «Нұрлы-Тау» бизнес орталығында орнатылды.

Сондай-ақ, О.Гермес герман экономикасының Шығыс комитетін басқарады, ол Шығыс Еуропа мен Орталық Азияның 29 елінде герман бизнесінің мүддесін білдіріп, Қазақстанмен сауда-экономикалық өзара іс-қимылды қолдайды. Қазіргі уақытта Солтүстік Рейн-Вестфалия мен Қазақстандағы Алматы облысы арасындағы серіктестік туралы мәселе қарастырылуда.

О.Гермес мырзаның табысты және нәтижелі жұмысына сенім білдіре отырып, Д. Кәріпов Елшілік тарапынан жан-жақты көмек көрсетуге уәде берді. Қазақстанның Құрметті консулы О.Гермес өз сөзінде Бюроның ашылуы ҚР мен ГФР арасындағы ынтымақтастықтың жоғары динамикасының көрсеткіші болып табылатынын және елдер арасындағы сауда-экономикалық, мәдени-гуманитарлық және өңірлік байланыстарды одан әрі кеңейтуге жол ашатынын атап өтті.

Іс-шараға Дортмунд қаласының мэрі Томас Вестфаль, «WILO SE» компаниясының басқарма мүшелері, ГФР-дағы ҚР Елшілігінің, жер министрліктерінің, мэрия мен Дортмундтың сауда-өнеркәсіп палатасының өкілдері қатысты.

Күннің маңызды және өзекті жаңалықтарын «Егемен Қазақстан» телеграм каналынан оқыңыз