Қазақстан • 27 Тамыз, 2021

Көкшетау «Атамекен» экспедициясының делегаттарын қарсы алды

«Егемен Қазақстан» РГ ұйымдастырған экспедиция Ақмола облысынан басталды, деп хабарлайды Egemen.kz.

Ақмолалықтар экспедиция қатысушыларын қаланың кіреберісіндегі қақпа алдынан қарсы алды.

Көкшетауда облыс әкімінің орынбасары Айна Мүсірәлімова қоғам қайраткерлерінің, өңірдегі ғалымдардың қатысуымен кездесу өткізді.

«Бұл жобаны облыс аумағында бірінші болып қарсы алу біз үшін үлкен мәртебе. Экспедиция Қазақстан Республикасы Тәуелсіздігінің 30 жылдығын мерекелеу аясында өтуде, оның мақсаты – өңірлердің тарихи-мәдени және туристік әлеуетін таныту. «Атамекен» атауы тәуелсіз елдің қасиетті бірлігін білдіреді. Конституция күнін мерекелеу қарсаңында бұл іс-шараны өткізудің символдық мәні зор, еліміздің қоғамдық-саяси және әлеуметтік салаларындағы барлық жетістіктері ерекше мәнге ие», деді қонақтарды қарсы алған Айна Мүсірәлімова.

Әкім орынбасары облыстың соңғы жетістіктері мен мерекеге арналған салтанатты іс-шаралардың жоспарларымен таныстырды. Мәселен, көкшетаулық 200 отбасы баспаналы болса, қаланың құқық қорғау және экологиялық қызметкерлеріне 50 пәтер, арнайы техника беріліпті.

«Егемен Қазақстан» РГ» АҚ Басқарма төрағасының бірінші орынбасары Владимир Курятов республикалық газеттің бұл акциясы – киелі орындарды зерттеу және Республиканың туристік әлеуетімен танысу арқылы болашаққа үндеу болатынын атап өтті.

Ол, сондай-ақ қазір бір акционерлік қоғам болып табылатын басылымдардың редакциялық саясаты туралы сөз қозғады. Басты назар – ел өміріндегі ең маңызды оқиғалар туралы жазатын, халықпен және аймақтармен тығыз байланыс орнататын газеттер болу. Осы контекстегі қазіргі акция – үлкен жұмыстың бір бөлігі екендігіне тоқталды

Сондай-ақ журналистер «Егемен Қазақстан» газетінің 100 жылдығы қарсаңында жарық көрген басылымдарды тарту етті. Оның ішінде 1919-2019 жылдары жазылған Сәкен Сейфуллин, Сәбит Мұқанов, Ғабит Мүсірепов, Әбіш Кекілбаев және т.б. авторлардың ең үздік мақалалары жинақталған бестомдық бар. Өз кезегінде әкімнің орынбасары экспедиция қатысушыларына Ақмола облысының әлеуметтік-экономикалық дамуына арналған фотоальбом ұсынды.

Кездесу соңында тараптар естелік сыйлықтармен алмасты.