Алдын ала болжам бойынша, жаңа оқу жылында өңірдегі оқушылар саны 440 мыңға өседі, ал бірінші сыныпқа 47 мың оқушы қабылданады.
«Барлық мектептер қорғаныс құралдарымен қамтамасыз етілді, осы мақсатқа жергілікті бюджеттен 200 миллион теңге бөлінді. Барлық білім беру объектілері Ashyq жобасына қосылды», деп атап өтті әкімнің орынбасары Батыржан Байжұманов Jetisy media брифингінде.
Облыс мектептерінде халықтың әлеуметтік осал топтарынан және аз қамтылған отбасылардан шыққан оқушылардың 100%-ы тегін ыстық тамақпен қамтамасыз етіледі.
«Көп балалы және аз қамтылған отбасылардан шыққан 44 531 оқушыны ыстық тамақпен, мектеп формасымен қамтамасыз етуге қосымша 2,6 миллиард теңге бөлінді», деп нақтылады облыстық білім беру басқармасы басшысының міндетін атқарушысы Жаңыл Сүлейменова.
Оның айтуынша, «Мектепке жол» акциясы аясында 12 902 оқушыға 122 миллион теңге көлемінде демеушілік көмек көрсетілді. Бұл бағыттағы жұмыстар әлі де жалғасуда.
Облыста 40 білім беру нысанының, оның ішінде 28 мектептің құрылысы жүргізілуде. Оқу жылының басында алты жаңа мектепті ашып, жыл соңына дейін тағы төрт мектепті тапсыру жоспарлануда.
