«Біздің аграрлық саясатымызда сабақтастық болмай отыр. Министр ауысса, саланың саясаты да өзгереді. Мұндай жағдайда шаруаларға адал жұмысты жоспарлау қиынға түседі. Бірыңғай негізгі бағыт болуы қажет. Соған сәйкес субсидиялау тәсілдерін қайта қарап, тұрақтандыру керек», деді Президент.
Өкінішке қарай, бұл салада түйткілдер көп. Бір жағынан сыбайлас жемқорлықтың салдарынан мемлекеттен бөлінген қаражат қарапайым диқандарға, ауыл тұрғындарына жетпей жатады. Мәселен, агроөнеркәсіп кешеніне қатысты қозғалған қылмыстық істердің жартысынан астамы субсидияны талан-таражға салуға байланысты болып отыр екен. Мемлекет басшысы айтқандай, бұған жол беруге болмайды.
Бұл мәселені бұрыннан көтеріп келе жатырмыз. Биылғы қуаңшылықтан кейін, су тапшылығы туындаған соң мал шаруашылығымен, диқаншылықпен айналысатын кәсіпкерлер үлкен проблемаларға кездесіп отыр. Сондықтан оларға субсидия беруге ерекше назар аударуымыз керек. Өйткені ауыл шаруашылығына қажетті техниканың көбі ескірген. Оны жаңартуды қарапайым шаруалардың қалтасы көтере бермейтіні белгілі.
Жолдауда басқа да өзекті, маңызды тапсырмалар берілді. Мысалы, қызметкерлердің жалақысын көтеру, кәсіпкерлерге жеңілдік беру секілді қоғам үшін маңызды міндеттер бар.
Азат ПЕРУАШЕВ,
Мәжіліс депутаты
