БҰҰ-ның мамандандырылған мекемесі болып табылатын ILO сарапшыларының деректері бойынша, қазіргі уақытта әлем халқының тек 47%-ы ғана әлеуметтік сақтандырумен қамтылған, ал 4,1 миллиард адам ұлттық әлеуметтік қорғау жүйелерінен ешқандай сақтандыру төлемдерін алмайды.
Баяндама авторлары әлеуметтік қорғау саласындағы маңызды аймақтық теңсіздікке ерекше назар аударды. Еуропа мен Орталық Азияда әлеуметтік сақтандырумен тұрғындардың 84%-ы қамтылған, бұл әлемдегі ең жоғары көрсеткіш болып табылады. Америкада бұл қамту 64,3%, Азия-Тынық мұхиты аймағында - 44%, араб елдерінде - 40%, Африкада - 17% құрайды.
«Біз тиімді және жан-жақты әлеуметтік қорғау тек әлеуметтік әділеттілік пен лайықты еңбекті ғана емес, сонымен бірге тұрақты болашақты қамтамасыз етудің маңызды құралы екенін мойындауымыз қажет», дейді ILO бас директоры Гай Райдер.
Сондай-ақ, құжатта әлемдегі балалардың басым көпшілігі әлі де тиімді әлеуметтік қорғаудан айырылғандығы көрсетілген. Әлемде тек әрбір төртінші бала белгілі бір әлеуметтік жәрдемақы немесе жеңілдіктерді пайдаланады. Жаңа туған балалары бар әйелдердің тек 45%-ы ғана аналарға арналған ақшалай жәрдемақы алады.
Мүгедектік бойынша жәрдемақыны денсаулығы нашар әрбір үшінші адам алса, жұмыссыздық бойынша жәрдемақымен одан да аз адамдар қамтылған. Іс жүзінде оны әлемдегі жұмыссыздардың тек 18,6%-ы ғана алады.
Сарапшылардың есептеуінше, халықты базалық әлеуметтік сақтандырумен толық қамту үшін табысы аз елдерге жыл сайын осы салаға 77,9 миллиард доллар, орташа кірісі бар мемлекеттерге - 362,9 миллиард, ал табысы жоғары елдерге - 750,8 миллиард инвестициялау қажет.
