Қоғам • 03 Қыркүйек, 2021

Әскери қызметке шақырудың күзгі науқаны басталды

Елімізде әскерге шақырудың күзгі науқаны басталды. Ол осы жылдың соңына дейін жалғасады. Осы уақыт ішінде Қарулы Күштердің, басқа да әскерлер мен әскери құралымдарының қатарын 18-27 жас аралығындағы он жеті мыңға жуық жас азамат толықтырады.

Egemen Qazaqstan

Жергілікті атқарушы органдар «Әскери қызмет және әскери қызметшілердің мәртебесі туралы» заңға сәйкес азаматтарды мерзімді әскери қызметке шақыруды ұйымдастырып, қамтамасыз етеді. Әскерге алынған күннен бастап 12 ай қызмет атқарған әскери қызметшілерді запасқа шығару да жоспарлы тәртіппен жүргізіледі.

Екінші жыл қатарынан әскерге шақыру науқаны пандемия жағдайында өтуде. Коронавирусты жұқтыру қаупін азайту үшін әскерге шақырылушыларды хабардар ету Цифрлық даму, инновациялар және аэроғарыш өнеркәсібі министрлігінің 1414 қызметімен SMS-хабарламалар жіберу арқылы жүзеге асырылады.

Вирустық инфекциядан қосымша қорғаныс ПТР-тексеру болып табылады. Әскерге шақырылушыларды екі рет тексереді. Әскерге шақыру кезінде жинау пункттерінде және әскери бөлімдерге жаңа толықтырулар келгеннен кейін. «Барлық сұрақтар бойынша азаматтар электронды пошта немесе қорғаныс істері жөніндегі департаменттердің әлеуметтік желілердегі ресми аккаунттары арқылы хабарласа алады. Сыбайлас жемқорлық көріністері туралы хабарламалар «Қарулы Күштер – адалдық алаңы» жобалық кеңселерінде және сенім телефондары арқылы қабылданады», деді Қарулы Күштер Бас штабы Ұйымдастыру-жұмылдыру жұмыстары департаментінің бастығы, полковник Сәкен Жүсіпов.

«Егемен-ақпарат»

Күннің маңызды және өзекті жаңалықтарын «Егемен Қазақстан» телеграм каналынан оқыңыз