Аймақтар • 03 Қыркүйек, 2021

Алматы тұрғыны массажға барып өртеніп кете жаздады

106 рет
көрсетілді
2 мин
оқу үшін

Медициналық орталықта массаж алуға барған алматылық Мағзума Қазбекова өртеніп кете жаздады, деп хабарлайды Egemen.kz.

Алматы тұрғыны массажға барып өртеніп кете жаздады

Бұл туралы КТК телеарнасы мәлімдеді.

Әйел медициналық орталық қызметкерлері қоңырау шалып қоймағасын сол жаққа барғанын айтады. Ондағылар кейбір қызмет түрлері тегін деп қызықтырған.

Оң жамбасы оңбай күйіп қалған Мағзума Қазбекова сол күнді қорқынышпен еске алады. Орта жастағы әйел медициналық орталық қызметкерлері қоңырау шалып қоймағасын сол жаққа барғанын айтады. Ондағылар кейбір қызмет түрлері тегін деп қызықтырыпты. Соңында ақшасы жоқтығын айтқан клиентті 300 мың теңгеге жуық кредит рәсімдеуге көндірген. Зардап шеккен әйел бірінші күні емдік шаралар ойдағыдай өтті дейді. Алайда ертесіне арқасына банкі қойып, отты массаж жасағанда өртеніп кете жаздадым деп мұң шағады.

«Бәрі екі-үш секунд ішінде болды. Ысып кетті ме деп едім, ана бала астымдағы төсек жайманы басып жіберді. Мен "Ойбай!" деп, жұлмалай бастадым. Артымдағы банкілерді итеріп-итеріп тастады. Массаж алуға келгенмін. Енді, міне, денем күйіп қалды», дейді Қазбекова.

Оған алғашқы көмек дұрыс көрсетілмеді. Жалма-жан таныс заңгерін шақырған ол үйіне өз күшімен әрең жетіпті. Кейін анықталғандай, массаж жасайтын маман спирт төгіп алып, соның кесірінен от тұтанған. Ал медициналық орталық мамандары кешірім сұраған да жоқ.

«Басында маман бүкіл шығыныңызда мойныма аламын деп айтты. Енді бәрі біткеннен кейін шамам келмейді дейді», деп атап көрсетті зардап шеккен әйел.

Медициналық орталық басшылығы қызметкерлердің қателігін кеш естідік деп ақталғаннан басқа мардымды жауап қатпаған көрінеді. Ал сол күнгі сорақылыққа куә болған заңгер адамгершіліктен аттаған клиниканың кемшілігін келісімшарттан көріп отыр.

«Келісімшартта медициналық орталық өзінің ғана пайдасын ойлап жазған», дейді заңгер Алмас Күнгейбаев.

Ал орталық өкілдері ісіне салғырт қараған қызметкердің жұмыстан уақытша шеттетілгенін айтады. Шығынды өтеуге әзірміз деп ақталғандар келіспеушілік клиенттің өзіне байланысты дейді.

«Клиентіміз күйік алған. Оны мойындаймыз. Кешірім сұраймыз. Моральдық-материалдық шығынын өтеуге толығымен дайынбыз. Біздің клиент ресми түрде бізге хабарласқан жоқ», деді «Venus medikal kz» ЖШС ресми өкілі Руслан Мұқанов.

Медициналық орталықтан көңілі қалған Мағзума Қазбекова полицияға арызданыпты. Моральдық және материалдық шығынды өтеп беруді талап еткен әйел барлығын сот арқылы шешпек.