Германия денсаулық сақтау министрі халықты жаппай вакцина салдыруға шақырды. Оның айтуынша, екпе алу көрсеткіші жақсармаса, жыл соңына дейін елдегі ауруханалар науқастарға толуы мүмкін. Әзірге Германия тұрғындарының тек 61 пайызы коронавирусқа қарсы вакцинаның екі дозасын алған. Бұл Еуропа елдерімен салыстырғанда төмен. Өкінішке қарай, аталған елде вакцина салғызғандар саны бірнеше аптадан бері төмендеп келеді.
Ұлыбритания билігі келесі аптада 12-15 жастағы жасөспірімдерге коронавирусқа қарсы вакцина салуға дайын. Бұл туралы Англияның Бас санитарлық дәрігері Крис Уитти мәлімдеді. Әйтсе де, әзірге билік өкілдері вакцина салдыру-салдырмау құқығын ата-аналарға бермек. Премьер-министр Борис Джонсон алдағы уақытта осыған байланысты Парламентте өтетін талқылауға қатысады.
Бахрейн де екпеге ерекше екпін беріп отыр. Ел билігі Sputnik V вакцинасын толықтай алғандарға күшейткіш доза қолдануға рұқсат етті. Осылайша, екі доза алғандар тағы да бір мәрте аталған препаратты салдыра алады.
Индонезияда вакцинадан дау туды. Таяуда президенттің коронавирусқа қарсы вакцина алғаны жөніндегі сертификат жарияланып кеткен. Содан кейін тұрғындардың жеке медициналық мәліметтерінің қауіпсіздігіне алаңдағандар саны көбейді. Өйткені мұндай ақпарат былайғы жұртқа жария етілмеуі тиіс. Сарапшылар екпеге арналған бағдарлама бұзылуы мүмкін екенін алға тартады.
Түркия 6 қыркүйектен бастап коронавируспен күресудің жаңа шараларын енгізді. Олардың арасында қалааралық автобустарда, пойыздарда және басқа да қоғамдық көлікте вакцина алмаған жолаушылар ПТР-тест анықтамасын көрсетуі қажет. Бұл ережелер концерттерге, кинотеатрларға және театрларға бару кезінде де қолданылады.
Франция еңбек министрі Элизабет Борн елде вакцина төлқұжатына қойылатын шектеулер жеңілдеуі мүмкін екенін мәлімдеді. Ол үшін науқастар саны азайып, вирус ауыздықталуы керек.
«Денсаулық жағдайы жақсарып келеді. Егер бұл расталса, біз ережелерді жеңілдете аламыз. Жақын күндері бұған да жетуіміз мүмкін», деді Франс Интер радиосына берген сұхбатында Э.Борн.
Польша AstvaZeneca вакцинасының 400,000 дозасын Тайваньға береді. Сыртқы істер министрлігінің хабарлауынша, бұл қадам Тайваньдағы вакцинация деңгейін жоғарылату мақсатында жасалып отыр.
Токиода төтенше жағдай режімі қыркүйектің соңғы аптасына дейін ұзартылады. Әйтсе де, Жапонияның қалған бөлігінде карантиндік шаралар жеңілдетілді. Өткен айда үкімет қабылдаған, Жапония халқының шамамен 80 пайызына әсер еткен төтенше шаралар 12 қыркүйекте аяқталуы керек еді. Бірақ Токио мен оған жақын маңдағы аймақтарда науқастардың көбеюіне байланысты төтенше жағдай режімін алып тастау кейінге шегерілді.
Словакияда «Дельта» штаммы тез таралып келеді. Денсаулық сақтау министрлігінің мәліметіне сүйенсек, елде анықталған инфекциялар арасында оның үлесі 99 пайыздан асады. Сарапшылардың айтуынша, Словакияда COVID-19 эпидемиясының үшінші толқыны басталды.
Ресейде тәулігіне 19 мыңға жуық адам инфекция жұқтырған. Жалпы, пандемия басталғалы 6 933 954 тұрғын коронавирус инфекциясына іліккен. 186 407 адам қайтыс болды.
Туризм саласы екінші жыл қатарынан COVID-19 пандемиясынан зардап шегіп отыр. Аталған сала 2020 жылы әуе қатынасы тоқтатылған кезде айтарлықтай шығынға ұшырады. Бүкіл әлемде халықаралық туристер саны 73 пайызға азайды.
2020 жылы әлемдік туризм индустриясына инвестициялар жылдық есеппен 29,3 пайызға азайған. Ал туризмге байланысты қонақүй мен тамақтану орындарының кірісі 2019 жылмен салыстырғанда 46,3 пайызға төмендеген.
