Білім • 07 Қыркүйек, 2021

Білім беру жүйесін жаһандық үрдістерге бейімдеу өзекті

42 рет көрсетілді

«Азаматтық алаң» пікір алмасу платформасының кезекті жиынына қатысушылар Мемлекет басшысының Қазақстан халқына Жолдауында айтылған білім беру жүйесін, жаңа заманауи жағдайларға бейімдеу қажеттілігі мен мүмкіндіктерін талқылады.

Мемлекет басшысы Қасым-Жомарт Тоқаев «Халық бірлігі және жүйелі реформалар – елдің өркендеуінің берік негізі» атты Қазақстан халқына Жолдауында отандық білім мен ғылымның алдында ауқымды міндеттер тұр­ғанын атап өтті. «Жаңа белестерді бағындырып қана қоймай, әр­қа­шан бір қадам алда болу, жаңа трендтерді қалыптастыру» жө­нін­де айта отырып, құзырлы мем­лекеттік органдарға сапалы білім беруді қамтамасыз ету бо­­йынша бірқатар жүйелі іс-шараны белгілеп берді.

«Азаматтық алаң» отырысы барысында жиынға төрағалық еткен «Рухани жаңғыру» қазақ­стан­­дық қоғамдық даму инсти­ту­ты­ның Басқарма төрағасы Асыл­бек Есенбаев қарқынды дамып келе жатқан әлемде білім мен дағ­дыға деген сұраныс тез өзге­ретінін, сондықтан да білім беру жүйесі жаңа үрдістерге икемді бейімделуі тиіс екенін айтты.

«Бір қадам алда болу – жас­тары­мыздың санасында қандай да бір кәсіптің немесе дипломның беделіне емес, осы кәсіптің қоғам үшін пайдалылығына қарай тиімді өзгеруі. Сонымен қатар біз білім беру – тек қана Білім және ғылым министрлігі мен әкім­­дік­тер­­дің ғана үлесі, тек мектеп, ЖОО-дары ғана білім береді де­ген түсі­­нік­тен алшақтауға тиіс­піз. Бү­­гін­де икемді дағдылар (soft skills) қазіргі заманғы адам дамуы­ның ажы­рамас бөлігіне айналды», деді ол.

Өз кезегінде, Білім және ғылым министрлігінің Мектепке дейінгі және орта білім комитетінің төрайы­мы Майра Мелдебекова қа­шық­тан оқыту форматтары үшін телекоммуникациялық жүйелердің сапасын жақсартудың маңыздылығын атап өтті.

– Мемлекет басшысы Қасым-Жомарт Тоқаев Қазақстан хал­қына Жолдауында білім саласына қатысты нақты тапсыр­ма­лар берді. Соның бірі – қа­шық­тан білім беруге қажет­ті ақпараттық жүйенің сапа­сын жақсарту. Пандемия уақы­ты бар­лығымызды өз сынына алған рас. Қашықтан оқыту барысында да қиындықтар болды. Осыған байланысты Мемлекет басшысы «Цифрлы ұстаз» білім беру жобасын қолға алып, ұстаздарға материалдық және моральдық қолдау көрсету керектігін де атап өтті. Мектепке дейінгі білім беру жүйесінде цифрлы жүйелерді енгізу өте орынды ұсыныс деп білемін, – деді М.Мелдебекова.

М.С.Нәрікбаев атындағы КАЗГЮУ Университетінің бас­қар­ма төрағасы, Нұр-Сұлтан қала­лық мәслихатының депутаты Талғат Нәрікбаев өз сөзінде Пре­зи­денттің Қазақстан халқына Жол­дауында көптеген маңыз­ды мәсе­лелер көтерілгенін атап өтіп, қа­шық­тан оқытудың тиімді тұстарына тоқталды.

– Мәселен, «Ғылымды дамыту – біздің аса маңызды басымды­ғы­мыз» деген Мемлекет басшысы ғылым туралы заң жобасына өз­ге­рістер мен толықтырулар ен­гізу туралы пәрмен берді. Бұл ертеңге салынып жатқан инвес­ти­ция деп ойлаймын. Коро­на­вирус пандемиясы біздің салаға да бірқатар өзгеріс алып келді. Әлемдегі барлық жоғары оқу орындары қашықтан оқыту жүйесіне көшті. Иә, қа­шық­тан оқыту жүйесі біраз сынал­ғаны да рас. Алайда қашық­тан оқыту жүйесінің бізге берген тиімді тұстарын да ай­та кеткен жөн. Мысалы, кезін­де шет елдерден алдыртып қиналатын ғалымдармен, бүгін біз қашық­тан оқыту жүйесі арқы­лы ұтымды шарттармен келісіп отырмыз, – деді ол.

«Азаматтық алаңда» Нұр-Сұлтан қаласының №90 гимна­зия­­сының директоры Аят­жан Ахметжанұлы да пікір­лерімен бөлісті. Ол халықаралық олимпиадаларда жүлделі орын­дарға ие болған дарынды балаларды қаржылай ынталандыру өте маңызды қадам екенін атап, спорттық олимпиададағыдай, жүлдегерлерді марапаттау білім және ғылым саласында да болуы керек деді. Сонымен қатар 2025 жылға дейін 1 мың мектеп салу бастамасын атап өтіп, бұл іс-шара ірі қалаларда ғана емес, шалғай, шекаралас аудандарда да заманауи сапалы мектептер салынуы керек екенін жеткізді. «Бұл ішкі көші-қон тұрғысынан да маңызды. Біз өңірлердегі жастарды сапалы біліммен қамтамасыз етуіміз керек», деді ол.

«Азаматтық алаң» отыры­сын­да БҒМ Ғылым коми­теті­нің төрағасы Жанна Құрман­ғалиева, Л.Н.Гумилев атындағы ЕҰУ Қаржы кафедрасының мең­геру­шісі Күләш Сәдуақасова және де тағы да басқа сала мамандары өз тәжірбиелері мен пікірлерін ортаға салды. Бұл пікір алмасу алаңының отырыстарын АҚДМ қолдауымен «Рухани жаңғыру» қазақстандық қоғамдық даму институты ұйымдастырып келе­ді. Сұхбат алаңының басты мақ­саты – «Рухани жаңғыру» бағ­дар­ламасын жүзеге асырудың тиім­ділігін арттыру үшін аза­маттық қоғам өкілдерін сындарлы сұхбатқа тарту.

 

Соңғы жаңалықтар

Алматыда троллейбус өртенді

Оқиға • 24 Маусым, 2022

ТүркПА-ның атауы өзгереді

Парламент • 24 Маусым, 2022

Ұқсас жаңалықтар