Сонымен қатар энергияның жаңа көздері, еңбек қатынастары, көші-қон мен демократияландыру, құқық қорғау саласын да назардан тыс қалдырмай, алдағы міндеттерді атап өтті. Қоғам арасында талқыға түскен мемлекеттік тіл мәселесін де күн тәртібінен қалдырмай, қазақ тілін білу отаншылдықтың белгісі екенін жеткізді. Сонымен қатар қоғам арасында белең алып бара жатқан әлеуметтік желілердегі бір күндік атаққұмарлық, вакцинаға қарсы елді үгіттеу сынды өзекті мәселелер қауіпті құбылыс екенін және зиялы қауым тарапынан осындай мәселелер ұдайы назарда болу қажеттігін атап өтті. Жолдаудағы қуантарлық жаңалық – ең төменгі жалақы 42 500 теңгеден 60 мың теңгеге дейін өсетіні. Аталған тапсырма 2022 жылдың 1 қаңтарынан бастап іске аспақ. Мәдениет саласы, кітапханашы, мұрағатшы, техникалық қызметкерлердің материалдық жағдайы назардан қалмай, алдағы 5 жылда жалақыны жыл сайын 20 пайызға өсіру туралы тапсырма – еліміздегі 600 мыңнан аса қызметкерге қолдау болмақ. Жолдауды іске асыру халық қалаулыларының да жіті назарында. Біздің тарапымыздан, яғни өңіріміздің 300-ден аса депутаты Жолдауды бір кісідей жүзеге асырып, ірі қалалардан шалғай ауыл тұрғындарына дейін маңызды құжатты насихаттау – жұмысымыздың бір бағыты болмақ. Бұл үшін мәслихат депутаттары ақпараттық-насихаттық топ құрамына енгізілмек.
Жалпы, VII шақырылымдағы Алматы облыстық мәслихатында 360 халық қалаулысы ел дамуы жолында еңбек етіп келеді. Оның ішінде облыстық мәслихаттың 45 депутаты бар. Жыл басынан бері облыстық мәслихаттың 7 сессиясы өтіп, өңірдің дамуы жолындағы маңызды мәселелер қаралып, аса жауапты шешімдер қабылданды. Әлеуметтік-экономикалық даму бағытында 46 шешім, оның ішінде 3 нормативті-құқықтық қаулы бекітілді. Қаралған мәселелердің ішінен өңірдің даму бағдарламасы, мемлекет-жекешелік әріптестік жобалары, туризм инфрақұрылымының дамуы, тексеру комиссияларының қызметі, автомобиль жолдары, жастар саясатының іске асуы, денсаулық сақтау саласының жағдайы және өзге де өзекті мәселелер бар. Атап айтсақ, биылғы 1-жартыжылдықтың қорытындысы бойынша түскен кірістер көлемі 114,7 пайызға орындалғанын ескере отырып және шұғыл шешімді талап ететін шығындарды қаржыландыру мақсатында салықтық түсімдер болжамын 30 млрд теңгеге арттыру туралы ұсыныс облыстық экономика және бюджеттік жоспарлау басқармасынан енгізіліп, мәслихат сессиясында бекітілді.
Мәслихат қызметіндегі бағыттардың бірі – тұрақты комиссиялардың жұмысы. Жыл басынан бері 23 отырыс ұйымдастырылып, әр сала бойынша 39 мәселе қаралды. Олардың қатарында, жолдарды жөндеу, білім, тұрғын үй-коммуналды шаруашылық, жұмыспен қамтудың жол картасы, денсаулық сақтау, құрылыс, ауыл шаруашылығы, инфрақұрылымды дамыту, электроэнергетика, экология, әлеуметтік қорғау, жұмыспен қамту, жер қатынастары және жол көлік саласы сынды аса маңызды бағыттардың нәтижесі талқыланды. Мысалға, тұрғын үй-коммуналдық шаруашылығы және құрылыс мәселелері жөніндегі тұрақты комиссия мүшелері Алматы облысында «Мүліктің меншік иелері бірлестігін немесе жай серіктестік» институтын енгізу жөніндегі реформаны жүзеге асыру аясында 48 түсіндірме жұмысын, 16 селекторлық жиын, тұрғындардың қатысуымен 1013 жиналыс өткізді.
Облыстық мәслихаттың жанындағы қоғамдық кеңестің 4 отырысы өтті. Кеңес мүшелері облыстың 2021 жылғы бюджетіне өзгерістер мен толықтырулар енгізу, өңірдің 2020 жылғы әлеуметтік-экономикалық дамуы мен 2021 жылғы міндеттері, қатты тұрмыстық қалдықтарды жинау, сұрыптау, жою және көму мәселелері, мемлекеттік органдар тарапынан көрсетілетін мемлекеттік қызметтің сапасына қоғамдық мониторинг жүргізу нәтижелері сынды мәселелерді қарап, тиісті ұсыныс-ескертпелер берді. Сонымен қатар жергілікті атқарушы және өкілді органдардың нормативті-құқықтық актілердің 20 жобасын талқылады. Алматы облысының мәслихаты мен тексеру комиссиясы арасындағы сыбайлас жемқорлыққа қарсы күрестегі өзара іс-қимыл туралы меморандумды іске асыру шеңберінде Облыстық тексеру комиссиясымен 2 бірлескен отырыс өткізілді.
Nur Otan партиясы «Өзгерістер жолы: Әр азаматқа лайықты өмір!» сайлауалды бағдарламасын іске асыру жөніндегі Жол картасының іске асыруын бақылау мақсатында облыстық мәслихат депутаттары, тұрақты комиссия мүшелері 2021 жылдың 3-10 маусым аралығында аудандар мен қалаларда әлеуметтік сала бойынша күрделі жөндеу жұмыстары жүргізіліп жатқан 9 мәдениет үйі және 34 мектептің құрылыс нысандарына мониторинг жүргізді. Бағдарлама аясында облыс бойынша жаңадан 7 өндіріс орны ашылды. Сонымен қатар 506,3 мың шаршы метр тұрғын үйдің құрылысы жоспарлануда, оның ішінде бюджет есебінен биыл 2 603 пәтерлі 521 тұрғын үй салынбақ. Алғашқы жартыжылдықта 245 отбасы, оның ішінде 15 көпбалалы отбасы баспаналы болды. Бұдан бөлек, 3 дәрігерлік амбулатория, 89 балабақша, 2 спорт-сауықтыру кешені, 106,5 шақырым сумен қамту нысандары, 509 шақырым газбен қамту нысандары салынып, 41,9 шақырым автомобиль жолдары жөнделді.
Депутаттардың сайлауалды бағдарламасындағы миссияның бірі – азаматтардың мәселелерін шешу және құзырлы органдар арасында алтын көпір болу. Осы орайда депутаттар жыл басынан азаматтармен кері байланыс орнатуда саяси партиялардың қоғамдық қабылдау алаңдарында тұрғындардың мәселелерін қарап, нәтижелі жұмыс атқарды. Халық қалаулылары 738 қабылдау өткізіп, 1 005 адамды қабылдады. Қабылдаулардың нәтижесінде 646 өтініш немесе бар мәселенің 64,2 пайызы оң шешім тапты. Қалған 359 мәселе бақылауда. Халық қалаулылары карантин талаптарының күшеюіне орай, әлеуметтік желілердің мүмкіндігін кеңінен пайдаланып, қоғамдық қабылдауларды онлайн өткізуде. Мәселен, саяси партиялармен бірлесе өткізілген «Депутатқа сауал қой» акциясы аясында Instagram, Facebook желілері арқылы 360-тан астам тікелей эфир жүргізіліп, оған 50 мыңнан астам халық қатысты. Депутаттар желілердегі тікелей эфирді одан әрі жалғастыруды жоспарлап отыр. Мәслихат депутаттарының жұмысын жүйелендіру, бұқаралық ақпарат құралдарымен жұмыс, халықпен кері тығыз байланысты орнату, заман талабына сай жаңа заңдардың іске асырылуы, қазіргі таңда нормативті-құқықтық актілермен, заңдарға енгізілген өзгерістердің бағыттарымен таныстыру мақсатында облыстық мәслихаттың депутаттарымен және аудандық қалалық мәслихат аппараты қызметкерлерінің қатысуымен жергілікті жерлерде кездесулер өткізілді.
Халқымызда «Қайыр қылсаң – бүтін қыл» деген мақал бар. Осы орайда халық қалаулыларының қайырымдылық бағытындағы істері көпке үлгі. Атап айтсақ, жыл басынан бері 5 мыңнан астам жетісулық азаматқа жалпы сомасы 90 578 500 теңге көлемінде қайырымдылық көмек көрсетіліп, мұқтаж жандардың қажеттілігі өтелді. Сонымен қатар «Мектепке жол» акциясы аясында өңір депутаттары жалпы 25 832 600 теңге көлеміндегі қаражатқа 1 107 баланы қажетті мектеп құралдары, киім-кешектермен қамтамасыз етті. Биылғы құрғақшылық еліміздің кейбір өңірлеріндегі жем-шөптің жетіспеушілігін тудырды. Соған орай халық қалаулылары Маңғыстау облысындағы мал азығының жетіспеушілігіне бірден назар аударып, қолдау көрсетті. Барлық депутаттар осындай игілікті істердің ұйытқысы болудан тартынған емес және бұл бағыттағы жұмысты жалғастыра бермек.
Жанболат ЖӨРГЕНБАЕВ,
Алматы облыстық мәслихатының хатшысы
