Иә, Өскеменді саябақтар мен аллеялар шаһары десек те болады. Қазақстанда теңдесі жоқ Сол жағалау паркіне табаныңыз тисе, қаланың қауырт тірлігін бір сәтке ұмытып, бел-белестерді, қырқа-қыраттарды асып кеткендей күйде боласыз. Құлақ тұндырған көліктің гуілі сап тиылып, бұлбұлы сайраған орман-тоғайды аралап кете барасыз... Қалаға ат басын бұрған меймандардың дені осы саябақтарды саялайды, қайық мініп Ертісті өрлейді. Велосипедпен шаһарды шиырлап келемін деген адамға да мүмкіндік бар. Дамылсыз дамып келе жатқан қаладағы нысандар туралы тізе беруге болады. Бәрінен де қызығы, Арбатқа қошқар мүйіз оюмен безендірілген жасыл кабина қойылды. Маңдайшасына Өскеменнің белгісі таңбаланыпты. Әп-әдемі. Бұл нендей дүңгіршек дейсіз ғой. Сөйтсек, Арбатта серуендеп жүрген адам мұнда кіріп, ұнаған кітабын алып оқуға болады екен. Нөсер төксе, дүңгіршек ішінде ілулі тұрған қолшатырларды да пайдалануға болады. Тек қана алып кетпей, кейін қайта орнына қоюыңыз қажет. Мұндай практика шетелдерде бар болғанымен, біздің мәдениетімізге қаншалықты сай, оны уақыт көрсетер.
– Қаланың өсіп-өркендеп келе жатқанына қуанамыз. Әсіресе, мынау топалаң кезінде әр түйір қуаныштың бағасы ат басындай алтыннан қымбат болып кеткені рас. Өскеменнің көшесіне күніне неше мәрте шықсаңыз, соншама қуанышпен жүздесіп қайтасыз, – дейді Арбатты аралай кетіп бара жатқан жазушы Әлібек Қаңтарбаев.
Мұндай кабина алғаш рет міне, Арбатқа қойылды. Ертеңгі күндері қаланың басқа да бөліктеріне орнатылады. Ең бастысы, мәдениетті елдердегідей күтіп ұстасақ болғаны. Айтқандай, көзге ерекше көрінетін дүңгіршекті фото зона ретінде пайдалануға да болады.
Өскемен
