Ресейдің Сочи қаласы мен оның маңында өтетін Қысқы Олимпиада кезінде Қазақстанның спорттық делегациясының шеф-демиссионы болып Спорт және дене шынықтыру істері агенттігі төрағасының орынбасары Елсияр Қанағатов бекітілді. Бұл туралы egemen.kz тілшісі хабарлады.
Қазақстан құрамасы командалары осымен 6-рет Қысқы Олимпия ойындарына жеке команда ретінде қатысатын болады. Тәуелсіздік алғаннан бері еліміз спортшылары Қысқы Олимпиадаларда 6 медальді, соның ішінде бір алтын, үш күміс және екі қола жүлдені иеленгенін білеміз. Олимпиада кезінде Қазақстанның спорттық делегациясының шеф-демиссионы қызметін атқаратын Елсияр Қанағатовтың айтуынша, енді биылғы Олимпиадада спортшылармыз кем дегенде екі жүлдені жеңіп алуға тырысатын болады. «Қазір бәрін кесіп айту қиын. Бәрін жарыстар көрсетеді. Дегенмен спортшыларымыз бен жарыстарымызға қарасақ, біздің елге кем дегенде екі медальді алуға болады. Бірақ ол алтын бола ма немесе басқа жүлде бола ма оны айту ерте», дейді ол. Оның айтуынша, қазір спортшыларымызға барлық жағдай жасалған. Ұлттық құрама мүшелеріне, соның ішінде жаттықтырушыларға, дәрігерлер мен массажистерге де мемлекет тарапынан қолда бар жағдайдың бәрі жасалып отыр. Енді ең бастысы спортшыларымыз еліміздің артқан сенімін, үмітін ақтаса игі, дейді ол.
Дастан Кенжалин.
Дереккөз: Спорт және дене шынықтыру істері агенттігі.
