Ерте көктемде аудан диқандары 400 мың гектардан астам алқапқа дәнді дақылдар тұқымын сіңірген болатын. Көктен июі кем болса да жерден бергеніне әзірге көңіл тоярлық. Жаздың ыстық болуына байланысты жылдағыға қарағанда, астық та ерте пісті. Биыл 15 мың гектар жерге дән еккен Аk Hilal серіктестігінің егістік алқабында сексеннен астам дала ерлері уақытпен санаспай жұмыс істеуде. Бүгінге дейін материалдық-техникалық базасын нығайтып, техникаларын жаңалап үлгерген ұжымның еңбек қарқыны да жоғары.
Серіктестік биыл бидай мен арпа егіпті. Әзірге барлық алқаптың үштен бірін тап-тұйнақтай етіп жинап алған. Диқандардың айтуына қарағанда, астықтың шығымдылығы мақтанарлық болмағанымен, есесіне сапасы тәуір. Дені екінші класты. Демек, бағасы да жоғары болмақ. Қамырлылығы да жылдағыға қарағанда жақсы.
– Диқан қауым әр жыл сайын көктемде үміт етеді емес пе? – дейді серіктестік құрылтайшысы Магомет Экажев. – Агротехникалық шараларды талапқа сай уақтылы атқардық. Тыңайтқыштарды да сіңірдік. Алайда жаздың аптап ыстық болғандығы белгілі. Ендігі үміт астық сапасының жақсылығында.
Жиырма жылдан астам еңбек етіп келе жатқан ұжым жетекшісі берекенің еңбекке байлаулы екендігін жыр қылып айтады. Егер жаңа технологияны батыл енгізіп, жұмыс істейтұғын болса, құнары мол жер де иіп сала бермек. Тағы бір ескеретін жайт, ауа райы құбылмалы өңірде ендігі арада құрғақшылыққа шыдамды бидай тұқымын қолданған абзал. Соңғы жылдары күн қабағы да өзгеріп келеді. Сондықтан биылғыдай қуаңшылыққа да дайын болу керек.
Дала ерлеріне барлық жағдай жасалған. Еңбекақылары да толымды. Көктемгі және күзгі науқандық жұмыс кезінде қауырт қимылдап, жақсы нәтиже көрсеткен еңбеккерлер тұп-тура біржылдық табыстарын таба алады. Уақыттан ұту үшін түскі және кешкі астары алқап басына жеткізіліп беруде. Өнімділігі жоғары 12 комбайн мен оннан астам жүк көлігі тәулік бойы дерлік пайдаланылуда.
Ел ырысын молайтуға ұмтылған серіктестік диқандары кейбір алқаптардан әр гектарына 10 центнерден өнім жинауда. Биылғыдай қуаңшылық жылы тәп-тәуір көрсеткіш. Ендігісі өнген ел ырысын жерде қалдырмай жинап алу.
Ақмола облысы,
Астрахан ауданы
