Экономика • 15 Қыркүйек, 2021

Биржадағы сауда қызып тұр

67 рет көрсетілді

«Астана» халықаралық қаржы орталығының биржасындағы (AIX) сауда-саттық қызып тұр. Өткен жылдың қаңтар-тамыз айларындағы жағдаймен салыстырғанда, биылғы 8 айда биржадағы сауда-саттық көлемі 3,5 есе өскен. Бұл ретте тамыз айындағы көрсеткіш 12 095 605,8 долларды құраған.

2021 жылғы тамыздың соңындағы жағдай бойынша, AIX биржасының ресми тізіміне 65 түрлі эмитенттің 103 бағалы қағаздар шығарылымы кіріп отыр. Онда сауда жасайтын брокерлердің 18-і – қазақстандық, 11-і – халықаралық. Биржаның орталық депозитарийінде инвесторлардың 141 мыңнан астам шоты ашылған.

Шілдеде BI Group-тың еншілес компаниясы «Мегастрой» ЖШС 6,3 млрд теңгелік құнды қағаздарын сәтті орналастырған. Бұл – алғашқы транш. Борыштық құралдар бағдарламасы бойынша 20 млрд теңгені құрайды. Құрылыс секторының тағы бір өкілі «Проект ЭНС» ЖШС-да борыштық құралдарын шығарды. Бұлар – 3,7 млн доллар көлеміндегі және 350 млн теңге көлеміндегі облигациялар.

Тамыз айының соңында АХҚО биржасында үлестік құралдар листингі бар компаниялардың («Қазатомөнеркәсіп», «Полиметалл», «Халық Банк», Ferro-Alloy Resources Limited, «Банк ЦентрКредит», Kaspi.kz, Kcell) жалпы нарықтық капитализациясы 44 млрд доллардан асты.

Осы жылдың 1 шілдесінде AIX Qazaq Index (AIXQI) іске қосылды. Ол бизнесі Қазақстанмен байланыс­ты компаниялар акцияларының көрсеткіштерін өлшейді және нарықтық капиталдандыру бойынша мөлшерленген индексті ұсынады. Индекс құрамына AIX, KASE және LSE биржаларында саудаланатын сегіз қазақстандық компанияның акциялары мен жаһандық депозитарлық қолхаттары кірді.

Жұмысын 1000 пункт белгісінен бастаған AIXQI алғашқы айды 993,93 пункт белгісінде аяқтады. Шілденің қорытындысы бойынша көрсеткіш 0,61 пайызға сәл-пәл төмендеген. Тамыз айында AIXQI индексі шілдемен салыстырғанда әлдеқайда жақсарып, айды 1034,42 пункт деңгейінде аяқтады. Өсім – 4,07 пайыз.

Индекс құрамына кіретін 8 ком­па­нияның 6-ауы тамыз айын өсіммен тәмам­дады. Оның ішінде банк секторынан «ЦентрКредит Банкі» мен «Халық банк­тің» акциялары үздік динамиканы көр­сетті. Олардың өсуі тиісінше 14,74 пайыз­ды және 13,25 пайызды құрады.

Сондай-ақ «Қазақтелекомның» акциялары да айтарлықтай өсім көрсетті – 12,75 пайыз. «Қазатомөнеркәсіп» акция­лары 7,99 пайызға өсті. Уран өндіруші ұлттық компания 2021 жылдың 6 айында салыстырмалы түрде әлдеқайда жақсы қаржылық нәтижелер көрсетті және акционерлерге 2020 жыл үшін дивиденд ретінде 150 млрд теңгеден астам төлем аударылғанын хабарлады.

Central Asia Metal (+0,91 пайыз) және Kaspi (+0,68 пайыз) акцияларының құны шамалы ғана өзгерді. Теріс мән көрсеткен 2 компания бар. Олар – «ҚазТрансОйл» және «Полиметалл». Қос компанияның акциялары тиісінше 5,73 және 7,89 пайызға төмендеген.

Соңғы жаңалықтар

«Аяулы жас келін» атанды

Қоғам • Бүгін, 09:00

Фермерлер дүкені ашылды

Қоғам • Бүгін, 08:58

Көш басында өзгеріс жоқ

Спорт • Бүгін, 08:55

Ширек финалға шықты

Теннис • Бүгін, 08:54

Жалпы есепте топ жарды

Спорт • Бүгін, 08:53

Уәдең қайда, шенеунік?

Қоғам • Бүгін, 08:52

Ұқсас жаңалықтар