Үстіміздегі жылы Қазақстандағы ауылдарды дамытуға 5,6 млрд. теңге қаралады. Өңірлік даму министрі Болат Жәмішев бұл қаржының коммуналдық шаруашылық жобалары мен әлеуметтік және инженерлік инфрақұрылым нысандарын жөндеуге жұмсалатынын жеткізді.
Үстіміздегі жылы Қазақстандағы ауылдарды дамытуға 5,6 млрд. теңге қаралады. Өңірлік даму министрі Болат Жәмішев бұл қаржының коммуналдық шаруашылық жобалары мен әлеуметтік және инженерлік инфрақұрылым нысандарын жөндеуге жұмсалатынын жеткізді.
Биылдан бастап елімізде жыл сайын 10 млн. шаршы метрден астам баспана тапсырылатын болады. Кеше Өңірлік даму министрлігінің алқа мәжілісінде айтылған бұл тұжырым жергілікті әкімдерге тұрғын үйлерді жаңғырту мәселесімен белсенді түрде айналысу керектігін білдіреді.
2015 жылы Назарбаев Университеті базасында медициналық мектеп ашылады. Ондағы білім толығымен ағылшын тілінде жүргізіледі. Мұнда сондай-ақ, онкологиялық орталық құру туралы жоспар да бар. Бүгінде бас миының ісіктері, ортақ онкология және балаларға арналған бөлімшелер жұмыс істейді.
Астана түбіндегі Талдыкөл сарқынды су жинақтаушысын жою жобасы 2016 жылға қарай аяқталады. «Жобаның мақсаты – тазартылған сарқынды суларды Есіл өзеніне жіберіп, Талдыкөл су жинақтаушысының ауданын 2 мыңнан 600 гектарға дейін азайту», деді қалалық коммуналдық шаруашылық басқармасының басшысы Павел Кулагин.
Оңтүстік Қазақстанда 44,5 млрд. теңгенің 59 инвестициялық жобасы жүзеге асырылып жатыр. Кеше облыс әкімі Асқар Мырзахметовтің қатысуымен өткен кәсіпкерлік және индустриялық-инновациялық даму басқармасының жиынында осы арқылы 5 мыңнан астам жұмыс орындарын ашу межеленіп отырғаны да айтылды. Мұның қатарындағы жалпы құны 28,8 млрд. теңгені құрайтын 21 жоба Индустрияландыру картасына енген.
Қостанай облысында прокуратураның араласуымен 9000 адам жалақыларын алды. Бұқаралық ақпарат құралдары өкілдерімен кездескен облыс прокуроры Марат Қайыбжанов кеше, сондай-ақ, жер телімдерін алу мен игеруге қатысты да бірқатар кемшіліктердің анықталып, олар бойынша нақты шаралар қолданылғанын тілге тиек етті.
Ақмола облысында сүзбе шығаратын цех іске қосылады. Астананы азық-түлікпен қамту бағдарламасы аясында қолға алынған бұл жобаны Ақкөл ауданындағы «Экомилк» ЖШС биылдан бастап жүзеге асырады. Жаңа цех іске қосылғанда 110 адам тұрақты еңбекпен қамтылады.
Өскеменде Шәкәрімнің «Қалқаман-Мамыр» поэмасының орыс тіліндегі нұсқасы кітап болып шықты. Ақынның аталмыш дастанын Шығыс Қазақстан облысына танымал журналист Қабдылқайыр Құдайбергенов орыс тіліне аударған.
Egemen.kz хабарлары мен облыстық әкімдіктер
сайттарының материалдары бойынша дайындалды.
