– Қауіпті вирусты жұқтырған науқастардың 93 пайызы сауығып шықты. Өңірде коронавирус инфекциясының таралуы соңғы бір айда 5,6 есеге төмендеді. Осыған байланысты 624 орындық инфекциялық стационар әзірленді. Стационарлардың жансақтау бөлімінде 40 төсектік орын бар. Қазір инфекциялық стационарда 518 науқас оқшауланып, төсектік орын жүктемесі 22 пайызды құрап отыр, – деді Б.Хаменова.
Коронавирус инфекциясының бірінші толқыны саналған былтырғы жазда дәрі-дәрмек тапшылығы байқалған еді. Мұны жоққа шығармаған облыс әкімі орынбасарының айтуынша, тұрғындардың жаны қысылып, дәрі іздеген сабылысынан соң дәрі-дәрмектің тұрақты қорын жасақтау, дәріханалардағы бағаның тұрақтылығын сақтау мақсатында «Атырау» әлеуметтік-кәсіпкерлік корпорациясы» АҚ мен «Іңкәр» ЖШС арасында келісім жасалып, 500 млн теңге бөлінген. Бұл қаржыға 42 түрлі дәрі-дәрмек сатып әкелінген. Бұған қоса, демеушілік көмекпен 3 млрд-тан астам теңгеге жеке қорғаныш құралдары мен медициналық техника сатып алынған.
– Қазір өңірде 14 ПТР-тест зертханасы жұмыс істеп тұр. Онда тәулігіне 16 мыңнан астам тест жүргізу мүмкіндігі бар. Медициналық мекемелерде жеке қорғаныш құралдары мен дәрі-дәрмектің екі айлық қоры жасақталды. Жедел медициналық көмек көрсету қызметін жетілдіру бағытында жаңадан 66 көлік алынып, 5 жылжымалы медициналық кешен іске қосылды. Атырау мен Құлсары қаласында 200 орындық модульдік аурухана пайдалануға берілді, – деді облыс әкімінің орынбасары.
Карантиндік шектеу шаралары әсіресе, шағын және орта бизнестің өкілдеріне оңай болмай тұр. Кейбір кәсіпкерлер шығынға батқанын айтады. Соған байланысты Ashyq жүйесі енгізілген еді. Мәселен, Атырауда 13 қыркүйекке дейін аталған жүйеге 8 409 кәсіпкерлік нысаны қосылыпты. Дегенмен қыркүйек басталғалы 4 848 нысан тексерілген. Сол кезде 292 нысанның екі апта бойы Ashyq жүйесін қолданбағаны анықталған. Осыған байланысты аталған нысандар екі апталық мерзімге бағдарламадан шығарылды.
Атырау қаласы мен 7 ауданда құрылған 64 мониторингтік топтың мүшелері карантиндік шектеу талабының сақталуын қадағалайды. Топ құрамында әкімдік, денсаулық сақтау, полиция мен басқа да органдардың өкілдері енгізілген. Жыл басынан бері мұндай топтар 51 713 нысанға 12 501 рейд жүргізіпті. Рейд нәтижесінде 850 құқық бұзушылық анықталды. Карантин талабын бұзған шағын және орта бизнес нысандары мен жеке тұлғаларға 83 618 515 теңге көлемінде 596 айыппұл салынған. Ал қыркүйек басталғалы жүргізілген 366 рейд кезінде 1 696 нысанның жұмысы қадағаланған. Тексеру нәтижесінде 31 әкімшілік іс қозғалып, салынған айыппұл көлемі 1 939 805 теңгені құрап отыр.
Әкім орынбасарының айтуынша, соңғы кезде вакцина салдыруға ынта білдірушілер қатары көбейген. Вакциналардың бірінші компонентін салдырғандар саны 215 357 (86%) адамға жетсе, екінші компонентті 166 570 тұрғын (76%) ектірген. Бұл – өңірде екпе алушылар қатарындағы тұрғындардың 71,8 пайызы. Қазір облыста 59 вакцина бекеті жұмыс істеп тұр. Оның ішінде 10 жылжымалы бекет бар. Бұл бекеттерге ақпан айынан бері вакциналардың бірінші компонентіне арналған 248 330, екінші компонент үшін 216 790 доза жеткізіліпті.
– Облыстың шалғай ауылдарын мекен еткен тұрғындардың вакцина салдыруын қамтамасыз ету мақсатында «Қазақстан теміржолы» АҚ-мен бірлескен жобаны қолға алған едік. Қазір алыстағы елді мекендердің тұрғындары вакциналау бекетіне пойызбен тегін жеткізіледі. Жұртшылықты вакцина салдыруға ынталандыру үшін облыстық әкімдіктің қолдауымен «Азаматтық Альянс» ЗТБ 30 маусымнан бері ақшалай ұтыс акциясын бастады. Оған вакцина алғандар ғана қатысуда. Ақшалай ұтыс ойынының жалпы жүлде қоры 40 млн теңгені құрайды. Бас жүлде – 10 млн теңге. Осы кезге дейін вакцина ектіргендер арасында 200 мың теңгенің 60 сертификаты, 1 млн теңгенің 6, сондай-ақ 3 млн теңге тұратын 2 сертификат ойнатылды, – дейді Б.Хаменова.
Жаһан жұртын жаналқымнан алған қауіпті вирусқа қарсы осындай іс-шаралар атқарылып жатқан Атырауда 1 447 дәрігер мен 5 093 орта буынды медицина қызметкері жұмыс істейді. Алайда денсаулық сақтау саласына әлі де 219 дәрігер жетіспейді. Әсіресе, жалпы тәжірибелік дәрігер, анестизиолог-реаниматолог, акушер-гинеколог секілді мамандар қажет-ақ. Ал биыл жоғары оқу орнын бітірген 34 жас маман келген. Оның ішінде 26 интерн, 5 резидент, 3 бакалавр бар.
