Алдағы бейсенбіде сенаторлар «Қазақстан Республикасының кейбір заңнамалық актілеріне азаматтардың жекелеген санаттарын әлеуметтік қорғау мәселелері бойынша өзгерістер мен толықтырулар енгізу туралы» заң жобасын екінші оқылымда қарайды.
Одан бөлек, Бюро отырысында Палата Комитеттерінің төрағалары сенаторлардың заң жобаларына бастамашылық жасауына қатысты атқарылып жатқан жұмыстар жөнінде есеп берді.
«Өткен сессияда Сенат депутаттары белсенділік танытып, 7 заң жобасына бастамашылық жасады. Жаңа сессияда бұл жұмыстың қарқыны ұлғая түспек. Осы сессияда сенаторлар 16 заң жобасы бойынша бастамашылық жұмысты бастап кетті. Мемлекет басшысының тапсырмасына сәйкес адам құқықтары жөніндегі уәкіл туралы заң жобасы мен оған ілеспе заң жобаларын, Салық кодексіне өзгерістер мен толықтырулар енгізу туралы және ғылым мәселелері жөніндегі заң жобаларын жыл соңына дейін қабылдауымыз керек», деді Мәулен Әшімбаев.
Сенаторлардың бастамашыл болуымен дайындалатын нормалардың қатарында мүгедектігі бар азаматтардың өмір сүру сапасын жақсарту мәселелері туралы заң жобасын да атап өткен жөн. Сол арқылы мүгедектігі бар бала тәрбиелеп отырған отбасылардың ерекше мәртебесін заңмен бекіту және олардың тұрғын үй жағдайын жақсарту мүмкіндіктерін кеңейту көзделіп отыр. Мемлекет басшысының тапсырмасы бойынша жайылым жерлерді пайдалану мәселелері туралы бастамашылық заң жобасы жайылым тапшылығына байланысты қалыптасқан жағдайды жақсартуға және ауыл шаруашылығының өзекті проблемаларын шешуге арналады. Сонымен бірге сенаторлар органикалық өнім өндіру және оның айналымы, есірткі құралдары мен жаңа синтетикалық заттардың заңсыз айналымына қарсы күресті күшейту және тағы басқа маңызды мәселелер бойынша заң жобаларын әзірлеп жатыр.
Отырыс барысында сенаторлар бастамашылық ететін заң жобаларының бәрі халықты толғандырған маңызды мәселелерді шешуге және заңнамадағы кейбір олқылықтарды жетілдіруге арналған еліміз бен қоғамымыз үшін қажетті нормалар екені айтылды.
Сондай-ақ, Сенат Бюросының мүшелері ТМД-ның Парламентаралық Ассамблеясындағы Қазақстан Парламентінің өкілетті өкілі лауазымына Игорь Мұсалимовтың кандидатурасын қарап, бекітті.
Бұдан басқа, отырыста Мәжілістен келіп түскен «Қазақстан Республикасының кейбір заңнамалық актілеріне мемлекеттік басқару деңгейлері арасында өкілеттіктерді қайта бөлу мәселелері бойынша өзгерістер мен толықтырулар енгізу туралы» заң жобасы жұмыс үшін Сенаттың Экономикалық саясат, инновациялық даму және кәсіпкерлік комитетіне берілді.
