Аймақтар • 21 Қыркүйек, 2021

Жиын-терін жалғасуда

264 рет
көрсетілді
4 мин
оқу үшін

Түркістан облысында күзгі жиын-терін аяқталуға жақын, ал «ақ алтынды» жинау науқанының қызған шағы. Алғаш болып мақта терімін бастаған Мақтаарал, Жетісай аудандарында бүгінде шитті мақтаның бір тоннасы 250 мың теңгеден қабылдануда. Бұл өткен жылмен салыстырғанда 100 мың теңгеге қымбат.

Жиын-терін жалғасуда

Өңірде 18 мақта өңдеу зауы­тының 206 қабылдау бекеті жұ­мыс істейді. Биыл 110 мың гектар алқапқа мақта дақылы егілген. Егістіктің гектарынан 25,2 центнерден, жалпы 276,1 мың тонна шитті мақта жинау жоспарланып отыр. «Ақ алтынның» 90 пайызы техниканың көмегімен жи­налады. Облыстық ауыл ша­р­уа­­шылығы басқармасының мә­лі­метіне қарағанда, биылғы қуаң­шы­лыққа қарамастан мақта­лы аудандардың шаруалары ағын суды артығымен алыпты. Ты­ңайт­­қыш пен тұқымдық шит­тен таршылық көрмей, жеңіл­де­тілг­ен бағада берілетін жанар-жағармай да жеткілікті болған. Диқандар мемлекеттік деңгейде жасалған келісім бойынша көрші Өзбекстаннан келетін ағын судың арт­қа­нын айтуда. Шаруалар әр гектардан орта есеппен 30 цент­нер­ден өнім алып, 500 мың тең­ге­ге дейін пайда табады.

«Мемлекет басшыларының екіжақ­­ты ынтымақтастық тура­лы ке­­лісімінің нәтижесінде осын­­­­дай өнім алынып, та­уар өн­­­­ді­ру­­шілердің әлеуметтік эко­­­­но­­микалық жағдайы артуда. Мақтаарал және Жетісай аудандары суды трансшекаралық «Достық» каналы арқылы алады», дейді ауыл шаруашылығы басқармасының басшысы Нұрбек Бадырақов.

Аудандарда жұмыс сапарымен болған облыс әкімі Өмірзақ Шөкеев ағын суды арттыру мақ­сатында қолға алынған су ар­на­ларын механикалық тазалау жұмыстарымен танысты. Об­лыстық бюджет есебінен Же­тісай ауданындағы барлық 241 шақырымды құрайтын 121 қашырт­қыға механикалық тазалау жұмыстары жүргізілуде. Бұл өз кезегінде суармалы жерлердің ағын сумен қамтамасыз еті­луін жақсартады. Жерасты суын тө­мендетіп, егістіктің тұз­да­нуы­­ның алдын алып, мақта да­қы­лының өнімділігін арттыра­ды. Сонымен қатар шаруалар­ды сапалы тыңайтқыштармен, тұ­қым­мен қамтамасыз етіп, өнім­ді­лікті арттыру мақсатында Өз­бекстан Республикасының «Rasayana» ЖШС-мен жұмыс қолға алынды. Аталған компания ауыл шаруашылығы тауар өн­дірушілеріне өнімділігі жоғары «Aminosid» тыңайтқыштары мен мақтаның «Сұлтан» элиталық тұқымдарын жеткізумен айналысады. Бұл тәжірибе мақтаның түсімділігін 40-60 центнерге жеткізуге болатынын көрсетіп отыр.

Облыста бүгінде 1,1 млн тонна көкөніс, 1,7 млн тонна бақша өнімдері, 290 мың тонна картоп және 61 мың тонна жеміс-жидек жиналды. Жыл соңына дейін күзгі өнімнің жалпы көлемі 3,5 млн тоннаға жеткізіледі. Өңірде әртараптандыру нәтижесінде мал азықтық дақылдардың көлемі 2,6 мың гектарға артып, 215,4 мың гектарға, бақша дақылдары 8,9 мың гектарға артып, 70,6 мың гектарға орналастырылған. Сәйкесінше, мақтаның егіс көлемі 16,2 мың гектарға кеміген. Сондай-ақ дәнді дақылдар – 300 мың гектар, майлы дақылдар – 85 мың, көкөніс – 43 мың, картоп 15 мың гектар көлемінде өсірілді. Облыстағы 238 мың гектар астықтан 238,3 мың тонна дән қамбаға құйылса, 46,1 мың гектар дәндік жүгерінің түсімділігі гектарына 57 центнер болып, 118 мың тонна, ал 83,5 мың гектар мақсары дақылынан 5,3 центнерден 36,4 мың тонна өнім жиналды. Соңғы жылдары еңбек өнімділігін еселеп арттыру бағытында облыстың климаттық ерекшелігін пайдалана отырып, «Бір алқаптан жылына 2-3 өнім алу» жобасы іске асырылып отыр. Биыл 9 мың гектарда 2 мыңға жуық жоба жүзеге асырылуда. Бүгінде бірінші өнімнен – 160 мың, екінші өнімнен 60 мың тоннадан астам өнім жиналды. Жалпы көлемі 1 424,6 гектар жылыжайда 145 мың тоннадан астам өнім өндірілді. Күзгі жиын-терін жұмыстары жалғасуда.

 

Түркістан облысы