Алтыншы рет ұйымдастырылып отырған отырыста қатысушылар азаматтық қоғамның даму үрдісі мен еліміздегі медиа саласының болашағы туралы сөз қозғады.
Кездесуге Қазақстанның Ақпарат және қоғамдық даму министрі Аида Балаева, Клуб мүшелері және арнайы шақырылған сарапшылар қатысты.
Отырысты ашқан Мәулен Әшімбаев Мемлекет Басшысы Қасым-Жомарт Тоқаевтың азаматтық және саяси саладағы негізгі бастамасы «Халық үніне құлақ асатын мемлекет» тұжырымдамасы аясында билік пен қоғамның тұрақты диалогын жолға қоюға және мемлекетті басқаруға азаматтық қоғамның қатысуын арттыруға арналған жүйелі реформалар қолға алынғанына назар аударды.
Сенат Спикері қазіргі таңда елімізде қоғамдық-саяси салада кезең-кезеңімен жүргізіліп жатқан реформалар жалғасып отырғанын айтты.
«Мемлекет басшысының биылғы Жолдауында маңызды міндеттер белгіленді. Біріншіден, ауылдық жерлерде азаматтық бастамаларды қолдаудың тиімді тетігін әзірлеу міндеті қойылды. Екіншіден, Мемлекет басшысы депутат мандатын бөлу кезінде әйелдер мен жастар үшін 30 пайыздық квотаны міндетті түрде ескеру туралы норманы заңмен бекітуді тапсырды. Үшіншіден, ерекше қажеттілігі бар азаматтарға да квота белгілеу керектігі айтылды. Мұндай қадамдар халықтың әртүрлі топтарының азаматтық құқықтарын ескеретін инклюзивті қоғам құруға ықпал етері сөзсіз», деді Сенат Төрағасы.
Клуб отырысында талқыланған маңызды мәселелердің бірі медиа саласына қатысты болды. Мәулен Әшімбаев пандемия кезеңінде медиакоммуникацияның ерекше рөл атқарғанын назарға алды.
«Пандемия кезеңінде нақты мәліметтер мен тексерілген ақпараттардың тапшылығы байқалды. Сондықтан адамдар ақпарат көздеріне мұқият мән беріп, беделді медиаларға ғана басымдық берді. Бұдан сапалы жаңалықтар тарататын журналистика пайда көрді. Нәтижесінде, әлемнің жетекші құралдарының оқырмандары көбейіп қана қоймай, олардың ақылы ақпарат қоры да арта түскен», деді Палата Төрағасы.
Сонымен қатар Мәулен Әшімбаевтың айтуынша, ресми ақпарат көздеріне деген сенімсіздік фейк-ньюсдердің және әртүрлі конспирологиялық теориялардың көбеюіне әкеліп соқтырған.
«Қазіргідей ақпараттар ағынында адасып қалмау үшін адамға ақ пен қараны ажырататын арнайы білім керек. Бұл ретте жаңа заман адамы үшін медиасауаттылықтың маңызы зор екені сөзсіз. Меніңше, осы трендті ескеріп, Қазақстанда әлемге ғылыми көзқарас қалыптастыратын салалық журналистиканы дамытуға және ғылымды дәріптейтін қоғамдық пікірдің көшбасшыларын дайындауға көңіл бөлген жөн. Бұл медиа саласының сапасын арттыруға мүмкіндік береді», деп қорытындылады Мәулен Әшімбаев.
