Қоғам • 22 Қыркүйек, 2021

Машина жасау саласында 2 мың жаңа жұмыс орны ашылады

2021 жылы өңірлерде машина жасау саласымен байланысы бар 14 жоба іске қосыу жоспарланған. Соның арқасында 2 мың тұрақты жұмыс орны ашылады, деп хабарлайды Egemen.kz.

Гауһар ҚАПАШ

Қазақстан машина жасаушыларының ІХ форумында ҚР Индустрия және инфрақұрылымдық даму вице-министрі Марат Қарабаев осындай дерек айтты.

«Елімізде электротехникалық машина жасау секторы қолға алынғанын атап өткен жөн. 7 айдың қорытындысы бойынша бұл сектордағы өсім 28%-ды, өндіріс көлемі 130 млрд теңгені құрады. Өндірістің өсуіне «Қайнар-АКБ» ЖШС, «Казцентрэлектропровод» ЖШС сияқты ірі ойыншылардың өндіріс көлемін арттыруы әсер етті.

Атап айтқанда, аккумулятор өндірісі өткен жылдың сәйкес кезеңімен салыстырғанда 3 есеге өсті.

Өнімдер Армения, Беларусь, Қырғызстан, Ресей, Әзербайжан, Тәжікстан, Өзбекстан, Украина, Грузия және Италияға экспортталды», деді министрдің орынбасары.

Вице-министр темір жол машинасын жасау бойынша 7 айда өндіріс көлемі 150 млрд теңге болғанын айтады. Бұл былтырғы кезеңнің көрсеткішінен 50% жоғары көрінеді. Ал ауыл шаруашылығы машинасын жасау бойынша 7 айда өндіріс көлемі 3 есе өсіп, шамамен 86 млрд теңге болған.

«Тау-кен және мұнай-газ машина жасау кәсіпорындары негізінен жүйе құрушы, мұнай сервистік компаниялар мен жер қойнауын пайдаланушылардың қажеттіліктерін қамтамасыз етуге бағытталған. 7 айдың қорытындысы бойынша екі секторда да жиынтық өндіріс көлемі 2020 жылдың сәйкес кезеңімен салыстырғанда 11% өсіп, 51 млрд теңгені құрады. 2021 жылы өңірлерде 2 мың жаңа жұмыс орнын ашатын, құны 79,6 млрд теңге болатын 14 жобаны іске қосуды жоспарлап отыр», деді Марат Қарабаев

Күннің маңызды және өзекті жаңалықтарын «Егемен Қазақстан» телеграм каналынан оқыңыз