Елбасы • 22 Қыркүйек, 2021

Елімізде шағын және орта кәсіпкерлік жыл санап артып келеді – Елбасы

297 рет
көрсетілді
1 мин
оқу үшін

Елбасы Нұрсұлтан Назарбаев «Бастау бизнес» жобасының 5 жылдығына арналған форумға қатысушыларға бейнеүндеу жолдады, деп хабарлайды Egemen.kz.

Елімізде шағын және орта кәсіпкерлік жыл санап артып келеді – Елбасы

«Баршаңызға мәлім, шағын және орта бизнесті жан-жақты қолдау — мемлекеттік саясаттың басым бағыттарының бірі. Сол үшін біз тиісті заңнаманы жетілдіріп, салық ауыртпалығын азайттық, әкімшілік рәсімдерді қысқартып, кредиттік ресурстарға қолжетімділікті арттырдық. Соның арқасында елімізде шағын және орта кәсіпкерлік субъектілері жыл санап артып, экономиканың осы секторында еңбек ететін азаматтар көбейді. Қазіргі таңда шағын және орта бизнес саласында жұмыс істейтін адамдардың саны 4 миллионға, ал оның жалпы ішкі өнімдегі үлесін 35 пайызға жеткізу үшін біраз шаруа атқарылып жатыр. Бұл міндет «Нұр Отан» партиясының «Өзгерістер жолы: әр азаматқа лайықты өмір» атты бағдарламасында нақты көрініс тапты», деп атап өтеді ҚР Тұңғыш Президенті Нұрсұлтан Назарбаев.

Сондай-ақ 2016 жылы елімізде жаппай кәсіпкерлікті дамыту жөнінде бастама көтергенін еске салып өтеді.

«Бүгінде бұл бастама осы мақсатқа қол жеткізудің маңызды құралына айналып отыр. Онда ауыл-аймақтар мен шағын қалаларда өз ісін бастаған кәсіпкерлерді қолдауға ерекше көңіл бөлу керегі айтылған. Бастаманың тағы бір негізгі бағыты – жаңадан кәсіп ашқан бизнесмендерді қолдау шараларын қаржылық сауаттылыққа оқыту жүйесін енгізу еді. Сөйтіп, «Атамекен» Ұлттық кәсіпкерлер палатасы «Бастау бизнес» жобасын қолға алды. Ол нәтижелі жұмыспен қамту және жаппай кәсіпкерлікті дамытуға арналған «Еңбек» бағдарламасының маңызды бөлігіне айналды», деді ҚР Тұңғыш Президенті. Нұрсұлтан Назарбаев.